ყირიმი რუსეთის უსაფრთხოებისთვის ისევე მნიშვნელოვანია, როგორც გრენლანდია აშშ-ისთვის, - ამის შესახებ რუსეთის საგარეო საქმეთა მინისტრმა სერგეი ლავროვმა რუსეთის 2025 წლის დიპლომატიური საქმიანობის შემაჯამებელ პრესკონფერენციაზე განაცხადა.

„ტრამპმა განაცხადა, რომ გრენლანდია აშშ-ის უსაფრთხოებისთვის მნიშვნელოვანია. ყირიმი რუსეთის უსაფრთხოებისთვის არანაკლებ მნიშვნელოვანია“, - განაცხადა ლავროვმა.

მისი თქმით, „გრენლანდია დანიის ბუნებრივი ნაწილი არ არის“.

„პრინციპში, გრენლანდია დანიის ბუნებრივი ნაწილი არ არის. ის არც ნორვეგიის ბუნებრივი ნაწილი ყოფილა და არც დანიის. ეს კოლონიური დაპყრობის შედეგია. სხვა საკითხია, ადგილობრივები შეჩვეულები არიან ამას და კომფორტულად გრძნობენ თუ არა თავს“, - აღნიშნა რუსეთის საგარეო საქმეთა მინისტრმა.

ასევე, ლავროვის განცხადებით, რუსეთს გრენლანდიის დაპყრობის გეგმა არ აქვს.

„გრენლანდიის ირგვლივ განვითარებულ მოვლენებს იმით ამართლებენ, მას რუსეთი ან ჩინეთი დაიპყრობს. ამის მტკიცებულება არ არსებობს. ეჭვი არ მეპარება, რომ ვაშინგტონში კარგად ესმით, რომ არც რუსეთს და არც ჩინეთის სახალხო რესპუბლიკას მსგავსი გეგმები არ აქვთ“, - განაცხადა ლავროვმა.