არქტიკაში ჩინეთსა და რუსეთს შორის თანამშრომლობის გაძლიერება შეშფოთებას იწვევს , - ამის შესახებ ევროპაში ნატო-ს მოკავშირეთა შეიარაღებული ძალების მეთაურმა ალექსუს გრინკევიჩმა განაცხადა.

„ვხედავთ, რომ ეს ბოლო რამდენიმე წლის განმავლობაში როგორც საზღვაო, ისე საჰაერო სივრცეში პატრულირების გაზრდით გამოიხატა. ვცდილობთ, ვიპოვოთ გზები, რათა ალიანსის წევრებმა არქტიკაში პოზიციები გააძლიერონ“, - განაცხადა გრინკევიჩმა.

ამასთან, ნატო-ს სამხედრო კომიტეტის თავმჯდომარემ, ადმირალმა ჯუზეპე კავო დრაგონემ აღნიშნა, რომ გამოწვევების მიუხედავად ალიანსი კვლავ ერთიანია.

დრაგონეს თქმით, აშშ-ის პრეზიდენტის დონალდ ტრამპისა და ნატო-ს გენერალური მდივნის მარკ რუტეს მიერ გრენლანდიასთან დაკავშირებით გამოცხადებული „მომავალი შეთანხმების ჩარჩო“ საწყის ეტაპზეა.

„ვიცით, რომ გრენლანდიის, დანიისა და აშშ-ის მიერ შემუშავებული ჩარჩო შეთანხმება არსებობს. ჩვენ შემდგომ ნაბიჯებს ველოდებით“, - აღნიშნა დრაგონემ.