დავით მათიკაშვილი - პროდუქტებზე, საწვავზე, მედიკამენტებზე ფასები არის ალოგიკურად დიდი, 86%-იანი ფასნამატი არის უზარმაზარი - ევროპულ ქვეყნებში არსებული მოცემულობა გვკარნახობს, რომ ფასნამატის შემცირება შესაძლებელია
საქართველოში პირველადი მოხმარების პროდუქტებზე, საწვავზე, მედიკამენტებზე ფასები არის ალოგიკურად დიდი. 86%-იანი ფასნამატი არის უზარმაზარი, რომელიც ვერ უძლებს ლოგიკას - ევროპულ ქვეყნებში არსებული მოცემულობა გვკარნახობს, რომ ფასნამატის შემცირება არის შესაძლებელი, - ამის შესახებ პარლამენტის საპროცედურო საკითხთა და წესების კომიტეტის თავმჯდომარემ, დავით მათიკაშვილმა ჟურნალისტებთან განაცხადა.
მისივე თქმით, ფასებთან დაკავშირებით დროებითი კომისია პარლამენტის საგაზაფხულო სესიაზე შეიქმნება.
„საგაზაფხულო სესიაზე იგეგმება დროებითი კომისიის შექმნა, რომელიც სამთავრობო კომისიასთან და სუს-ის მიერ წარმოებულ ცალკეულ პროცესებთან ერთად იქნება დაინტერესებული ფასწარმოქმნის ჯაჭვში არსებული რეალობით. მოხდება გამოკითხვა ამ საკითხის გარშემო მყოფი აქტორებისა და საპარლამენტო კომისია თავის დადებით როლს შეასრულებს იმ ძალიან მნიშვნელოვანი ამოცანის გადაწყვეტაში, რაც პრემიერ-მინისტრმა დააანონსა. ეს არის საქართველოში პირველადი მოხმარების პროდუქტებზე, საწვავზე, მედიკამენტებზე ფასების ლოგიკურ ზღვრამდე დაწევა, რომელიც, რა თქმა უნდა, არის ალოგიკურად დიდი. 86%-იანი ფასნამატი არის უზარმაზარი, რომელიც ვერ უძლებს ლოგიკას. ევროპულ ქვეყნებში არსებული მოცემულობა გვკარნახობს, რომ ამ ფასნამატის შემცირება არის შესაძლებელი. კარგია, რომ აქტიურად არის ბიზნესი ჩართული ამ საკითხის მოკვლევაში. ისინი თანამშრომლობენ ხელისუფლებასთან და იმედს გამოვთქვამ, რომ აპრილის ბოლომდეც არ მოხდება დალოდება და სასურველი იქნება, მანამდეც მოხდეს მოძებნა იმ შეხების წერტილებისა ბიზნესსა და შესაბამის სახელისუფლებოო რგოლებს შორის, რომელიც უზრუნველყოფს ფასების ლოგიკურ ნიშნულამდე დაწევას, რაც არ დააწვება მძიმე ტვირთად ჩვენს საზოგადოებას,“ - განაცხადა მათიკაშვილმა.
