ევროპის საბჭოს საპარლამენტო ასამბლეის (PACE) ბიურომ ასამბლეის რუსეთის დემოკრატიულ ძალებთან დიალოგის პლატფორმის მონაწილეთა სია დაამტკიცა.

კენჭისყრა დღეს სტრასბურგში, ევროპის საბჭოს საპარლამენტო ასამბლეის ზამთრის სესიის ოფიციალურ გახსნამდე გაიმართა.

ევროპის საბჭოს საპარლამენტო ასამბლეის ვებგვერდზე გამოქვეყნებულ ინფორმაციაში აღნიშნულია, რომ პლატფორმა ხელს შეუწყობს ემიგრაციაში მყოფ რუსეთის დემოკრატიულ ძალებსა და ასამბლეის წამყვან წევრებს შორის აზრთა გაცვლა-გამოცვლას სხვადასხვა საკითხებზე.

პლატფორმის შექმნის შესახებ ერთხმად მიღებულ რეზოლუციაში ასამბლეამ განაცხადა, რომ ის ხელს შეუწყობს „მდგრადი დემოკრატიული ცვლილებების განხორციელებას რუსეთში და უკრაინაში მდგრადი და სამართლიანი მშვიდობის მიღწევას, ასევე ჩადენილი საერთაშორისო დანაშაულებისთვის რუსი აქტორების პასუხისმგებლობის უზრუნველყოფას“.

რუსეთის დემოკრატიულ ძალებთან დიალოგის პლატფორმის შემადგენლობაში რუსეთის მხრიდან შედიან: ნატალია არნო, დიმიტრი გუდკოვი, მარკ ფეიგინი, ვლადიმერ კარა-მურზა, გარი კასპაროვი, მიხაილ ხოდორკოვსკი, ოლეგ ორლოვი, ანდრეი ვოლნა, ლიუბოვ სობოლი და ნადეჟდა ტოლოკონნიკოვა. ამასთან პლატფორმის შემადგენლობაში არიან მკვიდრი ხალხებისა და ეროვნული უმცირესობების წარმომადგენლები რუსეთიდან : რუსლან კუტაევი, ეკატერინა კუზნეცოვა, ვასილი მატენოვი, ლანა პილაევა და პაველ სულიანძიგა.

ევროპის საბჭოს საპარლამენტო ასამბლეის ვებგვერდზე გამოქვეყნებულ ინფორმაციის თანახმად, თუ ასამბლეა ბიუროს გადაწყვეტილებას დაამტკიცებს, პლატფორმა პირველ შეხვედრას ხუთშაბათს გამართავს.