უკრაინისთვის უსაფრთხოების გარანტიები მოიცავენ ევროპელი სამხედროების მცირე რაოდენობით განთავსებას - ძირითადად ფრანგებისა და ბრიტანელების, ასევე აშშ-ის მხარდაჭერას,- ამის შესახებ აშშ-ის სახელმწიფო მდივანმა, მარკო რუბიომ სენატში განაცხადა.

„ნატო-ს გადააზრებას რაც შეეხება, ის ნამდვილად უნდა იქნას გადააზრებული. უნდა გადაიაზროს არა მისი მიზნები, არამედ შესაძლებლობები.

მაგალითს მოგცემთ. ბევრი საუბარი უსაფრთხოების გარანტიებზე და უკრაინის შემთხვევაში ამაზე ზოგადი შეთანხმება არსებობს, მაგრამ ეს უსაფრთხოების გარანტიები მოიცავენ ევროპელი სამხედროების მცირე რაოდენობით განთავსებას - ძირითადად ფრანგებისა და ბრიტანელების - და აშშ-ის მხარდაჭერას. მაგრამ, ფაქტობრივად, უსაფრთხოების გარანტია აშშ-ის მხარდაჭერაა.

არ ვაკნინებ იმ ფაქტს, რომ ევროპაში ზოგიერთი ქვეყანა მზად არის ომის შემდგომ უკრაინაში სამხედროები განათავსოს, იმას ვამბობ, რომ ეს არარელევანტურია აშშ-ის მხარდაჭერის გარეშე”, - განაცხადა რუბიომ.

მისი თქმით, ეს იმიტომ ხდება, რომ ბოლო 20-30 წლის განმავლობაში ევროპელები საკმარის ინვესტიციებს არ ახორციელებდნენ თავიანთ თავდაცვით შესაძლებლობებში.

„იმედია ეს შეიცვლება. იმედია, ეს იცვლება და ზოგიერთ შემთხვევაში, ზოგიერთ კონკრეტულ ქვეყანაში ეს უკვე შეიცვალა. მაგრამ ეს ფაქტია, რომლის იგნორირება არ შეგვიძლია. ნატო უფრო ძლიერი იქნება, თუ ჩვენს მოკავშირეებს მეტი შესაძლებლობები ექნებათ…

რაც უფრო ძლიერები არიან ჩვენი პარტნიორები ნატო-ში, მით უფრო მეტი მოქნილობა ექნება აშშ-ს მსოფლიოს სხვადასხვა ნაწილში ჩვენი ინტერესების დასაცავად. ეს ნატო-ს მიტოვება არ არის, ეს 21-ე საუკუნის რეალობაა მსოფლიოში, რომელიც ახლა იცვლება”, - განაცხადა რუბიომ.