ამოცანა ის არის, რომ ამ ქვეყანაში გრანტი არ შემოვიდეს, სხვა პოლიტიკური ფული არ არსებობდეს, - ამის შესახებ „გახარია საქართველოსთვის“ ერთ-ერთმა ლიდერმა ლევან გოგიჩაიშვილმა განაცხადა, რითაც „გრანტების შესახებ“ კანონში დაანონსებულ ცვლილებებს ეხმაურება.

ლევან გოგიჩაიშვილმა „პალიტრანიუსის“ გადაცემა „360 გრადუსში“ განაცხადა, რომ „ქართული ოცნების“ ამოცანაა, ოპოზიციური პარტიები და სოციალური ჯგუფები იყვნენ კონტროლირებადი.

„მათი ამოცანაა, რომ ფული მარტო „ქართულ ოცნებას“ ჰქონდეს, ან „ქოლცენტრიდან“, ან კორუფციიდან. ამოცანაა, რომ თავისუფალი ფული არ იყოს, არაკონტროლირებადი ფული არ იყოს. შეიძლება ვიღაც პარტიებს მერე მისცენ, უცებ შეიძლება რომელიღაც ოპოზიციურმა პარტიამ მოახერხოს და იშოვოს რამდენიმე ათეული მილიონი და ის იქნება კონტროლირებადი. მათი ამოცანაა, რომ პარტიებს არ ჰქონდეთ ფული, სოციალურ ჯგუფებს არ ჰქონდეთ ფული იმისათვის, რომ იაქტიურონ, სოციალური პროდუქტი შექმნან“, - განაცხადა ლევან გოგიჩაიშვილმა.

ლევან გოგიჩაიშვილი პარლამენტის თავმჯდომარის, შალვა პაპუაშვილის განცხადებასაც გამოეხმაურა იმის შესახებ, რომ პარლამენტი ფასებთან დაკავშირებულ საპარლამენტო კომისიას მომავალ კვირას შექმნის.

გოგიჩაიშვილის თქმით, საპარლამენტო კომისიაში, პარლამენტში მყოფი მისი თანაპარტიელები აუცილებლად მიიღებენ მონაწილეობას.

„ჩვენ აუცილებლად მივიღებთ მონაწილეობას კომისიაში. არ მაქვს მოლოდინი, რომ მოსახლეობისთვის რეალური შედეგით დასრულდება, მაგრამ ეს იმას არ ნიშნავს, რომ ამ პროცესში არ მივიღებთ მონაწილეობას. მონაწილეობას მივიღებთ იმიტომ, რომ არ მივცეთ საშუალება, რომ კიდევ ერთხელ მოატყუონ საზოგადოება. ამ კომისიაში რომ შევალთ, დავსვამთ საკითხს, ბაღის თანამშრომლებს რომ აქვთ 800 ლარი ხელფასი , რატომ არ შეიძლება ამ ადამიანების ხელფასი გაიზარდოს? ექთნების ხელფასი გაიზარდოს?“, - განაცხადა ლევან გოგიჩაიშვილმა.