რელიგიის საკითხთა სახელმწიფო სააგენტოს თავმჯდომარე, ზაზა ვაშაყმაძე საქართველოს მთავრობის ადმინისტრაციაში, ირანის ისლამური რესპუბლიკის ახლად დანიშნულ საგანგებო და სრულუფლებიან ელჩს საქართველოში, სეიედ ალი მოჯანს შეხვდა. ამის შესახებ ინფორმაციას რელიგიის საკითხთა სახელმწიფო სააგენტო ავრცელებს.

მათივე ცნობით, გაცნობითი ხასიათის შეხვედრაზე რელიგიის სააგენტოს თავმჯდომარემ ელჩს თანამდებობაზე დანიშვნა მიულოცა და წარმატებები უსურვა.

„შეხვედრისას საუბარი შეეხო რელიგიის სააგენტოს საქმიანობას და რელიგიურ ორგანიზაციებთან თანამშრომლობის საკითხებს.

ირანის ისლამური რესპუბლიკის საგანგებო და სრულუფლებიანმა ელჩმა სააგენტოს თავმჯდომარეს მადლობა გადაუხადა და თანამშრომლობისთვის მზადყოფნა დაადასტურა.

ზაზა ვაშაყმაძემ დიპლომატს საჩუქრად სააგენტოს გამოცემები - „თბილისში მოქმედი საკულტო ნაგებობები 2020 წლის მდგომარეობით", „ოკუპირებული მემკვიდრეობა" და „რელიგიები საქართველოში" გადასცა”, - ნათქვამია ინფორმაციაში.