ადამიანები ხელს უწყობენ სიღნაღში ტრადიციული სპორტის სახეობების, ჩვენი ქვეყნის უნიკალური ხალხური სიმღერებისა და ცეკვების შენარჩუნებასა და განვითარებას, - ამის შესახებ "ძლიერი საქართველო-ლელოს" სიღნაღის ორგანიზაციის თავმჯდომარემ, მუნიციპალიტეტის საკრებულოს წევრმა გოჩა ფხოველიშვილმა განაცხადა, რომელიც მუნიციპალიტეტში არსებული სასპორტო, სახელოვნებო და საგანმანათლებლო წრეების პედაგოგებისთვის ხელფასების მომატებას ითხოვს.

ფხოველიშვილის განცხადებით, ის ბიუჯეტის კორექტირების პროცესში აპირებს საკითხის წამოწევას.

"მუნიციპალიტეტში არსებული სასპორტო, სახელოვნებო და საგანმანათლებლო წრეების პედაგოგები მიზერულ ფასად აკეთებენ უმნიშვნელოვანეს საქმეს: ხელს უწყობენ სიღნაღში ტრადიციული სპორტის სახეობების, ჩვენი ქვეყნის უნიკალური ხალხური სიმღერებისა და ცეკვების შენარჩუნებასა და განვითარებას და შემეცნებითი და საგანმანათლებლო სკოლისგარეშე პროგრამების საშუალებით მოზარდთა ცოდნის დონის ამაღლებას. მიგვაჩნია, რომ ადამიანებს, რომლებიც ამ უმნიშვნელოვანეს საქმეს ემსახურებიან, ბევრად ღირსეული ანაზღაურება უნდა ჰქონდეთ. საჭიროა გადაიხედოს მათი შრომის ანაზღაურების ოდენობა და არსებული ინფლაციის პირობებში მცირედით მაინც გაეზარდოთ ხელფასები, წინააღმდეგ შემთხვევაში ჩვენ ამ სპეციალისტებს დავკარგავთ და ამას მომავალში შეიძლება გამოუსწორებელი შედეგები მოჰყვეს ჩვენი ქვეყნისთვის უმნიშვნელოვანესი ტრადიციების შენარჩუნების თვალსაზრისით. სამწუხაროა, რომ ამ ეტაპზე ეს არ გაკეთდა, თუმცა ბიუჯეტის კორექტირების პროცესში ვაპირებ საკითხის ხელახლა წამოწევას", - განაცხადა გოჩა ფხოველიშვილმა.