„სტრატეგია აღმაშენებლის“ პოლიტიკური საბჭოს წევრის, ნანა ტოხვაძის განცხადებით, ხელისუფლების მიერ „განათლების რეფორმის" ფარგლებში მიღებული გადაწყვეტილება, რომ თბილისის სახელმწიფო უნივერსიტეტი და საქართველოს ტექნიკური უნივერსიტეტი გაერთიანდეს, აკადემიური სივრცის პირდაპირ დემონტაჟს წარმოადგენს.

ნანა ტოხვაძის თქმით, სტუ-ის და თსუ-ის ძალადობრივი შერწყმა ხდება, რაც ნიშნავს სისტემურ ქაოსს, ხარისხის ვარდნას და უნივერსიტეტების იდენტობის წაშლას.

„ბოლო ათწლეულში ხელისუფლებისგან შემოთავაზებული განათლების „რეფორმირების“ უამრავი მცდელობა გამიკრიტიკებია. ყველა მათგანი ქაოტური, უშედეგო და დამაზიანებელი რომ აღმოჩნდა, ამის შედეგებს დღეს საზოგადოება საკუთარ ტყავზე გრძნობს. განათლებას რომ შველა სჭირდება ესეც ბევრჯერ მოგისმენიათ ჩემგან, მაგრამ რეჟიმის მიერ ე.წ. „განათლების რეფორმის" ფარგლებში მიღებული გადაწყვეტილება თსუ-სა და სტუ-ს შერწყმის შესახებ, წარმოადგენს აკადემიური სივრცის პირდაპირ დემონტაჟს. ეს არ არის რეფორმა. დეფორმაც კნინობით-ალერსობითი სახელდებაა, იმ ზიანის და საფრთხეების გათვალისწინებით, რასაც გვიქადის! ეს არის უნივერსიტეტების განადგურება და გაუქმება. პარტიული ბიუროკრატების მიერ დაგეგმილი ანტიეროვნული და ანტისახელმწიფოებრივი ნაბიჯი საფრთხეს უქმნის:

განათლების ხარისხს; აკადემიურ თავისუფლებას; ათიათასობით სტუდენტის მომავალს.

ძალადობრივი შერწყმა ნიშნავს სისტემურ ქაოსს, ხარისხის ვარდნას და უნივერსიტეტების იდენტობის წაშლას. შერწყმა დღეს ნიშნავს გამოუსწორებელ ზიანს ხვალ, რადგან გადაწყვეტილება მიღებულია აკადემიური წრეების, სტუდენტებისა და პროფესორების მონაწილეობის გარეშე. ეს არის ავტორიტარული მართვის ლოგიკა, სადაც განათლება აღიქმება როგორც "საბიუჯეტო ხარჯი" და არა როგორც საზოგადოებრივი სიკეთის საფუძველი.

დღეს ეს შერწყმა საღდება „რეფორმად“, ხვალ კი მივიღებთ: გაუქმებულ პროგრამებს, დანგრეულ სამეცნიერო და კვლევით ინსტიტუტებს, დისკრედიტირებულ დიპლომებს, გაყიდულ შენობებს, შეუზღუდავ პარტიულ კონტროლს, დაქვემდებარებულ საუნივერსიტეტო სივრცეს, სამსახურის გარეშე დარჩენილ პროფესორებს, განათლების მიღმა დარჩენილ ათიათასობით სტუდენტს და ჯამში საყრდენგამოცლილ სახელმწიფოს!

#დაიცავი განათლება, დაიცავი საქართველო" – აცხადებს ნანა ტოხვაძე.