სტრატეგიული შეიარაღების შემცირების შესახებ შეთანხმების ვადის ამოწურვამდე აშშ-ს ოფიციალურ მიმართვას არ გადავცემთ, - ამის შესახებ რუსეთის საგარეო საქმეთა მინისტრის მოადგილემ, სერგეი რიაბკოვმა განაცხადა.

სერგეი რიაბკოვის განცხადებით, სტრატეგიული შეიარაღების შემცირების შესახებ შეთანხმების (START) ვადის გაგრძელების შესახებ რუსეთის წინადადებაზე აშშ-ის მიერ „პასუხის არარსებობა, პასუხს წარმოადგენს“.

„სტრატეგიული შეიარაღების შემცირების შესახებ შეთანხმების ოფიციალური ვადის ამოწურვამდე დარჩენილი დღე-ნახევრის განმავლობაში ამერიკელებს არანაირ დემარშს ან ოფიციალურ მიმართვას არ გადავცემთ. ჩვენ ყველაფერი, რაც საჭირო იყო, დიდი ხნით ადრე გავაკეთეთ. მათ ამის გაცნობიერებისთვის საკმარისი დრო ჰქონდათ“, - განაცხადა რიაბკოვმა.

ცნობისთვის, აშშ-მა და რუსეთმა ახალი სტრატეგიული შეტევითი შეიარაღების შემცირების შესახებ ხელშეკრულება 2010 წელს გააფორმეს. ხელშეკრულების ვადა 2021 წელს ხუთი წლით გაგრძელდა. 2023 წლის თებერვალში რუსეთის პრეზიდენტმა, ვლადიმერ პუტინმა ხელშეკრულებაში რუსეთის მონაწილეობა შეაჩერა. გასულ წელს ვლადიმერ პუტინმა აშშ-ის პრეზიდენტს, დონალდ ტრამპს ხელშეკრულებით გათვალისწინებული შეზღუდვების ერთი წლით დაცვა შესთავაზა, თუმცა რუსულ მხარეს აშშ-სგან ოფიციალური პასუხი არ მიუღია.

აშშ-სა და რუსეთს შორის სტრატეგიული შეტევითი შეიარაღების შემცირების შესახებ ხელშეკრულების ვადა 2026 წლის 5 თებერვალს იწურება.