აზერბაიჯანის რესპუბლიკის პრეზიდენტმა ილჰამ ალიევმა და სომხეთის პრემიერ-მინისტრმა ნიკოლ ფაშინიანმა აბუ-დაბიში პირისპირ შეხვედრა გამართეს, - ინფორმაციას სომხური მედია ავრცელებს.

მათივე ინფორმაციით, მანამდე შეხვედრა გაიმართა გაფართოებულ ფორმატშიც, რომელსაც ესწრებოდნენ სომხეთის ვიცე-პრემიერი მჰერ გრიგორიანი, საგარეო საქმეთა მინისტრი არარატ მირზოიანი, უშიშროების საბჭოს მდივანი არმენ გრიგორიანი, პარლამენტის ვიცე-სპიკერი რუბენ რუბინიანი, ასევე აზერბაიჯანის ვიცე-პრემიერი შაჰინ მუსტაფაევი, საგარეო საქმეთა მინისტრი ჯეიჰუნ ბაირამოვი, აზერბაიჯანის პრეზიდენტის თანაშემწე ჰიქმეთ ჰაჯიევი და პრეზიდენტ ალიევის წარმომადგენელი ელჩინ ამირბეოვი.

ცნობისთვის, ილჰამ ალიევი და ნიკოლ ფაშინიანი არაბთა გაერთიანებული საამიროების დედაქალაქში „ადამიანური ძმობის ზაიედის პრემიის“ მისაღებად ჩავიდნენ. სომხეთისა და აზერბაიჯანის ლიდერები პრემიის წლევანდელ გამარჯვებულებად გამოცხადდნენ.