აშშ-სა და რუსეთს შორის ბირთვულ შეიარაღებაზე კონტროლის შეთანხმების ვადის გასვლა სახიფათო მომენტს წარმოადგენს, - ამის შესახებ გაერო-ს გენერალურმა მდივანმა, ანტონიო გუტერეშმა განაცხადა.

ანტონიო გუტერეში აშშ-სა და რუსეთს შორის გაფორმებული ახალი სტრატეგიული შეტევითი შეიარაღების შემცირების შესახებ ხელშეკრულების (New START) მოქმედების ვადის გასვლას გამოეხმაურა და მხარეებს ახალი შეთანხმების მიღწევის მიზნით მოლაპარაკებებისკენ მოუწოდა.

„ნახევარ საუკუნეზე მეტი ხნის განმავლობაში პირველად, ჩვენ ვდგავართ სამყაროს წინაშე, როდესაც რუსეთის ფედერაციისა და ამერიკის შეერთებული შტატების სტრატეგიულ ბირთვულ არსენალზე დაწესებული სავალდებულო შეზღუდვები აღარ არსებობს. აღნიშნული ორი სახელმწიფო მსოფლიოში არსებული ბირთვული იარაღის მარაგების უდიდეს ნაწილს ფლობს. მოვუწოდებ ორივე სახელმწიფოს, რომ მოლაპარაკებების მაგიდას დაუყოვნებლივ დაუბრუნდნენ“, - განაცხადა გუტერეშმა.

ცნობისთვის, აშშ-მა და რუსეთმა ახალი სტრატეგიული შეტევითი შეიარაღების შემცირების შესახებ ხელშეკრულება (New START) 2010 წელს გააფორმეს. ხელშეკრულების ვადა 2021 წელს ხუთი წლით გაგრძელდა. 2023 წლის თებერვალში რუსეთის პრეზიდენტმა, ვლადიმერ პუტინმა ხელშეკრულებაში რუსეთის მონაწილეობა შეაჩერა. გასულ წელს ვლადიმერ პუტინმა აშშ-ის პრეზიდენტს, დონალდ ტრამპს ხელშეკრულებით გათვალისწინებული შეზღუდვების ერთი წლით დაცვა შესთავაზა, თუმცა რუსულ მხარეს აშშ-სგან ოფიციალური პასუხი არ მიუღია.

აშშ-სა და რუსეთს შორის გაფორმებული სტრატეგიული შეტევითი შეიარაღების შემცირების შესახებ ხელშეკრულების მოქმედების ვადა 2026 წლის 5 თებერვალს შუაღამისას ამოიწურა.