ბესარიონ ალავიძე რასაც ამბობს, ჩემთვის წარმოუდგენელია - ჩემზე ზეწოლა გამორიცხულია, თუ მოსამართლეები ამოიღებენ ხმას და იტყვიან, არა, როდესაც უნდა ითქვას არა, მაშინ სამართალს ყოველთვის მიეცემა გასაქანი - ამის შესახებ თეთრიწყაროს რაიონული სასამართლოს თავმჯდომარე, ვლადიმერ ხუჭუა აღნიშნავს, რითაც ეხმაურება უზენაესი სასამართლოს ყოფილი მოსამართლის, ბესო ალავიძის განცხადებას, სადაც ის ამბობს, რომ მოსამართლეებზე ზეწოლა ხორციელდება.

როგორც ხუჭუა აღნიშნავს, მოსამართლეების მხრიდან „ამას უნდა გაეცეს პასუხი“.

„ჩემზე ზეწოლა გამორიცხულია, ამას ვერავინ გააკეთებს, მე ვერავინ შემიშლის ხელს, რომ ვემსახურო ქართველ ხალხს, ეს გამორიცხულია. ბესარიონ ალავიძე რასაც ამბობს, ჩემთვის წარმოუდგენელია. ის თავის გამოსვლებში ადასტურებს, რომ მოსამართლეებზე ხორციელდებოდა და ხორციელდება ზეწოლები, ისინი არიან შეშინებულები, არიან ჩუმად, ვერ იღებენ ხმას და მას აქვს ამის დამადასტურებელი უტყუარი მტკიცებულებები. გაოგნებული ვარ, ამასთან დაკავშირებით, რატომ არის დუმილი, რადგან ამას უნდა გაეცეს პასუხები. შეუძლებელია, რომ ეს საკითხი დარჩეს გამოკვლევის გარეშე. თუ მოსამართლეები ამოიღებენ ხმას და იტყვიან, არა, როდესაც უნდა ითქვას არა, მაშინ სამართალს ყოველთვის მიეცემა გასაქანი”,- აღნიშნავს ხუჭუა.