აშშ-ის წინა ადმინისტრაციამ ქართულ - ამერიკული ურთიერთობები იმდენად დააზიანა, გამოსწორება ძალიან რთული იქნება - ეს რთული, მაგრამ დაძლევადი პროცესია, - ამის შესახებ „ქართული ოცნების“ დეპუტატმა, თენგიზ შარმანაშვილმა ჟურნალისტებთან აშშ-საქართველოს ურთიერთობებსა და მიხეილ ყაველაშვილის განცხადებებზე საუბრისას აღნიშნა.

„ერთია რას ვიტყვით ჩვენ და ჩვენი პრეზიდენტი, მეორეა რას იტყვის თავად ამერიკის საგარეო უწყება. მისმა სპიკერმა განაცხადა, რომ აშშ-ში ჩვენი საგარეო საქმეთა სამინისტროს წარმომადგენლებთან შეხვედრები შედგა და ამ ნაბიჯებს როგორც წინ გადადგმულს ისე უყურებენ. ასეთი განცხადებები ამერიკელების მხრიდან ოპტიმიზმს გვმატებს - ეს რთული, მაგრამ დაძლევადი პროცესია“, - განაცხადა შარმანაშვილმა.

კითხვაზე, იგულისხმება თუ არა დაძლევად პროცესში ურთიერთობების გადატვირთვა, შარმანაშვილმა აღნიშნა, რომ „აუცილებლად, რადგან ამერიკის ახალი ადმინისტრაციის მსოფლმხედველობა საქართველოსას დეტალებშიც კი ემთხვევა“.

„ის ცნობილი თარიღიც კი, რომელიც ჩვენთან ოჯახის სიწმინდის თარიღად გამოვაცხადეთ, იქაც ლოცვის თარიღად გამოცხადდა. დეტალების დონეზეც კი საერთო მსოფლმხედველობა გვაქვს, რაც დარწმუნებული ვარ, ადრე თუ გვიან შედეგს მოიტანს.

საქმის გაფუჭებაა ადვილი, თორემ შემდეგ ამის შემოტრიალება რთულია. აქ ურთიერთობები ერთჯერადად კი არა მთელი სპექტრით გაფუჭდა, მაგრამ ნელ-ნელა ვიწყებთ აღდგენას“, - განაცხადა თენგიზ შარმანაშვილმა.

ცნობისთვის, მიხეილ ყაველაშვილის განცხადებით, იტალიაში, ზამთრის ოლიმპიური თამაშების გახსნის ცერემონიალზე დამსწრე სახელმწიფოთა მეთაურების პატივსაცემად, მასპინძელი ქვეყნის პრეზიდენტის სახელით გამართული საზეიმო მიღებისას, აშშ-ის სახელმწიფო მდივან მარკო რუბიოს და ვიცე-პრეზიდენტ ჯეი დი ვენსს შეხვდა. მისი თქმით, ჯერ ჯეი დე ვენსი მიესალმა, შემდეგ კი მარკო რუბიო „ცოტა მეტხანს შეჩერდა და მათი საუბარი “უფრო სიღრმისეული გამოდგა”.

აღნიშნულ დიალოგზე მან ვრცლად “იმედის” ეთერში ისაუბრა და აღნიშნა, რომ მარკო რუბიოს თქმით, „საქართველოსთან მიმართებაში წინა ადმინისტრაცია უდიდესი ნეგატივის მატარებელი იყო“ და რომ “ტექნიკურ ჯგუფს მოამზადებენ იმისთვის, რათა გაანალიზებულ რეჟიმში, ურთიერთობების სუფთა ფურცლიდან დაწყება გახდეს შესაძლებელი”.