უკრაინის საგარეო საქმეთა მინისტრის, ანდრეი სიბიგას განცხადებით, ევროკავშირის ტერიტორიაზე შესვლაზე სრული აკრძალვა უნდა დაუწესდეთ რუსეთის იმ მოქალაქეებს, რომლებმაც უკრაინის წინააღმდეგ რუსეთის აგრესიაში მონაწილეობა მიიღეს.

„პირველ რიგში, საქმე ეხება ევროპული სახელმწიფოების გრძელვადიან ეროვნულ უსაფრთხოებას და მათი მოქალაქეების დაცვას რუსი ავაზაკებისგან. მეორეც, ეს არასწორი არჩევანისთვის სწორ ფასს დააწესებს: ყველა რუსმა, რომელიც ხელს აწერს უკრაინაში შეჭრის შესახებ კონტრაქტს, უნდა იცოდეს, რომ ის ასევე ხელს აწერს უვადო აკრძალვას ევროპის ტერიტორიაზე შესვლაზე“, - წერს სიბიგა.

მისი განცხადებით, ესტონეთმა უკვე აჩვენა ლიდერობა შესაბამისი გადაწყვეტილებების ეროვნულ დონეზე მიღებით და იმის დამტკიცებით, რომ მექანიზმი მუშაობს.

„ახლა დროა, ეს მთელ ევროკავშირზე გაფართოვდეს და მოვუწოდებ ჩემს ევროპელ კოლეგებს, სერიოზულად მოეკიდონ ამ ნაბიჯს. საქმე ევროპის უსაფრთხოების გაძლიერებას ეხება“, - წერს სიბიგა.