აშშ-ის სახელმწიფო მდივანი მარკო რუბიო, მიუნხენის კონფერენციის შემდეგ, სლოვაკეთსა და უნგრეთში გაემგზავრება, - ინფორმაციას სახელმწიფო დეპარტამენტი ავრცელებს.

„სახელმწიფო მდივანი მარკო რუბიო მიუნხენის 62-ე უსაფრთხოების კონფერენციაში მონაწილეობის მისაღებად 13-15 თებერვალს გერმანიაში გაემგზავრება. შემდეგ, 15-16 თებერვალს, სახელმწიფო მდივანი რუბიო ბრატისლავას, სლოვაკეთს და ბუდაპეშტს, უნგრეთს ეწვევა“, - აღნიშნულია ინფორმაციაში.

სახელმწიფო დეპარტამენტის ცნობით ბრატისლავაში, სახელმწიფო მდივანი სლოვაკეთის მთავრობის წევრებს შეხვდება, რათა ხელი შეუწყოს რეგიონული უსაფრთხოების საერთო ინტერესებს, გააძლიეროს ორმხრივი თანამშრომლობა ბირთვული ენერგიისა და ენერგიის დივერსიფიკაციის საკითხებში და მხარი დაუჭიროს სლოვაკეთის სამხედრო მოდერნიზაციასა და ნატო-ს წინაშე აღებულ ვალდებულებებს.

ამასთან, სახელმწიფო დეპარტამენტის ცნობით, ბუდაპეშტში ვიზიტის დროს, სახელმწიფო მდივანი უნგრეთის მთავრობის წარმომადგენლებს შეხვდება.

„ბუდაპეშტში ვიზიტის დროს, სახელმწიფო მდივანი უნგრეთის მთავრობის წარმომადგენლებს შეხვდება, რათა გაამყაროს საერთო ორმხრივი და რეგიონული ინტერესები, მათ შორის ჩვენი ერთგულება გლობალური კონფლიქტების მოსაგვარებლად სამშვიდობო პროცესებისა და აშშ-უნგრეთის ენერგეტიკული პარტნიორობის მიმართ“, - აღნიშნულია ინფორმაციაში.