უკრაინის საკითხზე მოლაპარაკებები გრძელდება, თუმცა, წინ ჯერ კიდევ დიდი გზაა, - ამის შესახებ რუსეთის საგარეო საქმეთა მინისტრმა, სერგეი ლავროვმა განაცხადა.

„არაერთხელ გვითქვამს, რომ არ შეიძლება მიმდინარე მოვლენები დიდი აღფრთოვანებით აღვიქვათ, თითქოს, აშშ-ის პრეზიდენტმა დონალდ ტრამპმა ევროპელები და ვოლოდიმირ ზელენსკი თავიანთ ადგილებზე მოსვა და მათგან ვალდებულებების შესრულებას ითხოვს. ეს ყველაფერი კარგია, თუ უკრაინაში მშვიდობის მიღწევა გვსურს, თუმცა ჯერ იქამდე არ მივსულვართ“, - განაცხადა ლავროვმა.

ასევე, მისი თქმით, „ბირთვული ენერგიის გლობალურ ბაზარზე რუსეთის წამყვანი პოზიცია ამერიკელებისთვის გამოწვევას წარმოადგენს და მათ ამის შეცვლა სურთ“.

„იმ ქვეყნებში, სადაც პროექტები და გამოცდილება გვაქვს, მათ შორის, ჩვენს მეზობელ ქვეყნებსა და ევროპის რიგ ქვეყნებში, ამერიკელები მუშაობენ იმისთვის, რომ მათი ეკონომიკა თავიანთ სტანდარტებს მოარგონ. ისინი ამას არც მალავენ. არაფერს ვამბობ სანქციებსა და ტარიფებზე, რომლებიც იმატებს იმ ქვეყნებისთვის, რომლებიც არ უსმენენ ამერიკელებს იმასთან დაკავშირებით, თუ როგორ ითანამშრომლონ რუსეთის ფედერაციასთან”, - აღნიშნა რუსეთის საგარეო საქმეთა მინისტრმა.