ჩინეთი მზადაა საავიაციო საწვავის დეფიციტის ფონზე კუბას დაეხმაროს, - ამის შესახებ ჩინეთის საგარეო საქმეთა სამინისტროს წარმომადგენელმა, ლინ ძიანმა განაცხადა.

„ჩინეთი კუბას ეროვნულ სუვერენიტეტსა და უსაფრთხოებას მხარს უჭერს და უცხოურ ჩარევას ეწინააღმდეგება. ჩვენ კუბას მხარდაჭერასა და დახმარებას ყოველთვის აღმოვუჩენთ“, - განაცხადა ჩინეთის საგარეო უწყების წარმომადგენელმა.

ცნობისთვის, გასულ თვეში აშშ-ის პრეზიდენტმა, დონალდ ტრამპმა კუბა აშშ-ის ეროვნული უსაფრთხოებისთვის „საშიშ და უჩვეულო საფრთხედ“ გამოაცხადა და ვენესუელიდან კუბაზე ნავთობის ექსპორტი აკრძალა. ამასთან, ტრამპმა აღმასრულებელი ბრძანება გამოსცა და ქვეყნებს, რომლებიც კუბას ნავთობს აწვდიან, ტარიფების დაწესებით დაემუქრა.

ორშაბათს, კუბის საავიაციო ორგანომ განაცხადა, რომ აშშ-ის ბლოკადის გამო ქვეყანაში საავიაციო საწვავის მარაგი ამოიწურა და საერთაშორისო ავიაკომპანიებს ამის შესახებ უკვე აცნობა.