რამდენიმე დღის წინ ჩვენ ღიად მივაწოდეთ საზოგადოებას ინფორმაცია, რომ სუს-ის ხელმძღვანელი მდინარაძე, ივანიშვილის მიერ შიკრიკად იყო გაგზავნილი შეერთებულ შტატებში, - ამის შესახებ პარტია „გახარია საქართველოსთვის” დეპუტატმა, გიგა ფარულავამ ჟურნალისტებთან განაცხადა, რითაც სუს-ის უფროსის, მამუკა მდინარაძის აშშ-ში ვიზიტს გამოეხმაურა.

მისი თქმით, სუს-მა „კეთილი უნდა ინებოს და საზოგადოებას აუხსნას, რა მიზნებისთვის გააგზავნა ივანიშვილმა მდინარაძე და ვისთან ჰქონდა შეხვედრები“.

„რამდენიმე დღის წინ ჩვენ ღიად მივაწოდეთ საზოგადოებას ინფორმაცია, რომ სუს-ის ხელმძღვანელი მდინარაძე, ივანიშვილის მიერ შიკრიკად იყო გაგზავნილი შეერთებულ შტატებში. მაშინ ეს კონკრეტული ინფორმაცია სუს-მა მყისიერად უარყო, დღეს კი თავად დაადასტურეს ის სიცრუე, რაც მაშინ განაცხადეს. კეთილი ინებონ და საზოგადოებას აუხსნან რა მიზნებისთვის გააგზავნა ივანიშვილმა მდინარაძე და ვისთან ჰქონდა შეხვედრები”, - განაცხადა გიგა ფარულავამ.

კითხვაზე, რა ინფორმაცია აქვთ, რის გამო იყო მამუკა მდინარაძე აშშ-ში და შეეხებოდა თუ არა ეს ვიზიტი ბიძინა ივანიშვილისთვის სანქციების მოხსნის საკითხს, ფარულავამ განაცხადა, რომ „სუს-ის გამოხმაურებას უნდა დაველოდოთ”.

„რა თქმა უნდა, პირველი: ივანიშვილის პირადი ინტერესები. მოვუწოდებთ სუს-ს და მამუკა მდინარაძეს რომ აუხსნან საზოგადოებას, რა მიზნებისთვის იყო იქ და ვისთან ჰქონდა შეხვედრები. დაველოდოთ სუს-ის გამოხმაურებას”, - აღნიშნა გიგა ფარულავამ.

ცნობისთვის, სახელმწიფო უსაფრთხოების სამსახურის განცხადებით, სუს-ის უფროსი, მამუკა მდინარაძე 7-10 თებერვალს, თავისი კოლეგების მიწვევით, სამუშაო ვიზიტით ამერიკის შეერთებულ შტატებში იმყოფებოდა.უწყების ცნობით, შეხვედრა უსაფრთხოების საკითხებთან დაკავშირებით გაიმართა.