WhatsApp-ის წარმომადგენლები აცხადებენ, რომ რუსეთმა აპლიკაციის დაბლოკვა სცადა. „დღეს რუსეთის მთავრობამ WhatsApp-ის სრულად დაბლოკვა სცადა, რათა მოსახლეობა სახელმწიფო საკუთრებაში არსებულ სათვალთვალო აპლიკაციაზე გადაიყვანოს“, - ნათქვამია განცხადებაში.

განცხადებაში აღნიშნულია, რომ რუსეთის ხელისუფლება „100 მილიონზე მეტი მომხმარებლის პირადი და უსაფრთხო კომუნიკაციისგან იზოლირებას ცდილობს“.

გასულ თვეში, რუსულმა მედიამ ინფორმაცია გაავრცელა, რომ WhatsApp-ის აპლიკაცია ქვეყანაში 2026 წლის ბოლომდე დაიბლოკება. რუსეთის ხელისუფლების განცხადებით, აპლიკაცია რუსი მომხმარებლების მონაცემების ქვეყანაში შენახვაზე უარს ამბობს.

უცხოური აპლიკაციების შეზღუდვების ფონზე რუსეთის მთავრობა მოსახლეობას სამთავრობო მესენჯერის, MAX-ის გამოყენებისკენ მოუწოდებს.

ცნობისთვის, სამშაბათს რუსეთის კომუნიკაციების მარეგულირებელმა ორგანომ, „როსკომნადზორმა“ გამოაცხადა, რომ რუსეთში Telegram-ის მესენჯერზე წვდომა შეიზღუდება და მიზეზად აპლიკაციის უსაფრთხოების ნაკლებობა დაასახელა. მესენჯერის რუსმა დამფუძნებელმა, პაველ დუროვმა შეზღუდვების შესახებ განაცხადა, რომ რუსეთის ხელისუფლების ზეწოლას არ შეეგუება.