მიუხედავად იმისა, რომ „ოცნების” პროპაგანდა ცდილობს, ჰელსინკის კომისიის როლი დააკნინოს, რა თქმა უნდა, ნებისმიერი ასეთი შეფასება მნიშვნელოვანია - მე მგონი, მოულოდნელი და სიურპრიზი არ ყოფილა, რაც მოვისმინეთ, - ამის შესახებ “გახარია საქართველოსთვის” დეპუტატმა, გიორგი შარაშიძემ ჟურნალისტებთან განაცხადა.

მისივე თქმით, ასეთი განცხადებებისგან განსაკუთრებული მოლოდინი არ უნდა გვქონდეს, თუმცა არც დაკნინება შეიძლება.

“ჰელსინკის კომისიას რაც შეეხება - მე მგონი, მოულოდნელი და სიურპრიზი არ ყოფილა, რაც მოვისმინეთ. მიუხედავად იმისა, რომ “ოცნების” პროპაგანდა ცდილობს, დააკნინოს ჰელსინკის კომისიის როლი, იმ ფონზე, როდესაც საქართველოსა და ამერიკის შეერთებულ შტატებს შორის ურთიერთობა ძალიან დაბალ დონეზეა და ძალიან შორსაა იმ ნიშნულისგან, რაზეც 4-5 წლის წინ იყო, რა თქმა უნდა, ნებისმიერი ასეთი შეფასება არის მნიშვნელოვანი. თუმცა არც რაღაცა განსაკუთრებული მოლოდინი უნდა გვქონდეს ასეთი განცხადებებიდან და ბრიფინგებისგან და, რა თქმა უნდა, არც მათი დაკნინება შეიძლება. ძალიან მნიშვნელოვანია, როდესაც საქართველოში არსებულ გაუსაძლის სიტუაციაზე, როდესაც არც ადამიანის უფლებებია დაცული და არც კანონის უზენაესობა, საუბრობენ ისეთი მაღალი ტრიბუნიდან, როგორიცაა ჰელსინკის კომისია,” - განაცხადა შარაშიძემ.