ზელენსკისთან შეხვედრის ჩატარების ადგილის შესახებ ვლადიმერ პუტინის პოზიცია უცვლელი რჩება, - ამის შესახებ კრემლის პრესსპიკერმა, დიმიტრი პესკოვმა განაცხადა.

„პუტინის პოზიცია ყველასთვის კარგად არის ცნობილი“, - განაცხადა პესკოვმა.

მისი თქმით, უკრაინის პრეზიდენტმა, ვოლოდიმირ ზელენსკიმ „უკვე არაერთხელ განაცხადა, რომ შესაძლო შეხვედრისთვის მოსკოვში არ ჩავა“.

„ეს ახალი განცხადება არ არის. ამიტომ, ეს სიახლეს არ წარმოადგენს“, - აღნიშნა კრემლის პრესსპიკერმა.

ცნობისთვის, ვოლოდიმირ ზელენსკიმ ოთხშაბათს ჟურნალისტებთან საუბრისას განაცხადა, რომ რუსეთის პრეზიდენტთან, ვლადიმერ პუტინთან ნებისმიერ ტერიტორიაზე შეხვედრისთვის მზად არის, რუსეთისა და ბელარუსის გარდა.

„მზად ვართ, აშშ-ის წინადადებას მხარი დავუჭიროთ და ამერიკის, ევროპის, ნებისმიერი ნეიტრალური ქვეყნის ტერიტორიაზე შევხვდეთ, გარდა რუსეთის ფედერაციისა და ბელარუსისა“, - განაცხადა უკრაინის პრეზიდენტმა.