კობახიძის ინიციატივა 6 წელზე მეტი ასაკის ავტომობილების იმპორტის შეზღუდვასთან დაკავშირებით გაუმართლებელია იმ პირობებში, როცა არ არსებობს გამართული საზოგადოებრივი ტრანსპორტი და მოსახლეობის დიდი ნაწილი სოციალური სიდუხჭირის გამო მოკლებულია არა თუ ახალი მანქანების შეძენის ფუფუნებას, არამედ ბევრად საბაზისო საყოფაცხოვრებო პრობლემების წინაშეა – კვება, ჯანდაცვა და ა.შ, - ამის შესახებ „გახარია საქართველოსთვის“ დეპუტატი, გიორგი შარაშიძე სოციალურ ქსელში წერს.

მისი თქმით, ყველა შეზღუდვა და აკრძალვა აზრს კარგავს იმ ქვეყანაში, „სადაც ეკონომიკური ზრდა არა ხალხზე, არამედ 25 კორუმპირებულ ოჯახზე და „ოცნებასთან“ დაახლოებულ პირთა მცირე ჯგუფზე აისახება“.

„აღარაფერს ვამბობ მორალურ მხარეზე, როცა ამ ინიციატივით გამოდის კორუმპირებული „ოცნება“, რომლის მთავრობისა და პარლამენტის წევრთა უმრავლესობა ძვირადღირებული, ხშირ შემთხვევაში 200 ათას ლარზე მეტი ღირებულების, მაღალი კლასის მანქანებით გადაადგილდება და მათი პირადი საოჯახო ავტოპარკის ჯამური ღირებულება ხშირად რამდენიმე მილიონია.

გაცილებით სწორი ასაკობრივ ცენზზე ეტაპობრივი გადასვლა იქნებოდა, როცა 6 წელზე მეტი ასაკის ავტომობილების იმპორტზე შედარებით მაღალ გადასახადს, ხოლო 10+ წლოვანების მანქანებზე სრულ აკრძალვას დავაწესებდით.

თუმცა, ყველა შეზღუდვა და აკრძალვა აზრს კარგავს იმ ქვეყანაში, სადაც ეკონომიკური ზრდა არა ხალხზე, არამედ 25 კორუმპირებულ ოჯახზე და „ოცნებასთან“ დაახლოებულ პირთა მცირე ჯგუფზე აისახება, ვარკეთილის მეტროს ჭერი კი კვლავ შეუკეთებელია“, - წერს გიორგი შარაშიძე.

საქართველოში 6 წელზე მეტი წლოვანების ავტომობილის შემოყვანა აიკრძალება.

ამის შესახებ პრემიერ-მინისტრმა ირაკლი კობახიძემ მთავრობის დღევანდელ სხდომაზე განაცხადა.

როგორც კობახიძემ განმარტა, 2012 წელს საქართველოში 864 ათასი ავტომობილი იყო რეგისტრირებული და წლევანდელი მონაცემებით, ამ მაჩვენებელმა 2 მილიონს გადააჭარბა.