პარლამენტის პლენარულ სხდომაზე, 18 თებერვალს, ინტერპელაციის წესით, პრემიერ-მინისტრის, ირაკლი კობახიძისა და რეგიონული განვითარების მინისტრის, კახაბერ გულედანის მოსმენაა დაგეგმილი.

როგორც პარლამენტის თავმჯდომარემ, ბიუროს სხდომაზე აღნიშნა, კახაბერ გულედანი პარლამენტში ფრაქციამ „საქართველოსთვის“ მიიწვია.

რაც შეეხება პრემიერ-მინისტრის, ირაკლი კობახიძის ინტერპელაციას, ის ფრაქცია „ქართული ოცნების“ მიერაა მიწვეული.

„ოთხშაბათს გვაქვს ორი ინტერპელაცია. პირველი არის პრემიერ-მინისტრის, ირაკლი კობახიძის ინტერპელაცია. ფრაქცია „ქართულმა ოცნებამ“ მიმართა ინტერპელაციის წესით პრემიერ-მინისტრს, მიგრაციის საკითხებთან დაკავშირებით. აქედან გამომდინარე, 12:00 საათზე გვექნება პრემიერ-მინისტრის ინტერპელაცია. გარდა ამისა, ფრაქციამ „საქართველოსთვის“ ინტერპელაციის წესით მიმართა რეგიონული განვითარების მინისტრს, კახაბერ გულედანს და პრემიერ-მინისტრის ინტერპელაციის შემდეგ, იქნება რეგიონული განვითარების მინისტრის ინტერპელაცია“, - განაცხადა პაპუაშვილმა.