სანამ არის ოკუპაციის მძიმე გარემოება, რუსეთ-საქართველოს შორის დიპლომატიური ურთიერთობები ვერ აღდგება, - ამის შესახებ პარლამენტის რეგიონული პოლიტიკის და თვითმმართველობის კომიტეტის თავმჯდომარემ, ირაკლი ქადაგიშვილმა რუსეთის საგარეო საქმეთა მინისტრის განაცხადების საპასუხოდ აღნიშნა.

მისი თქმით, „საქართველოს სუვერენიტეტი ერთგვარ ეკონომიკურ თუ ფინანსურ ბენეფიტზე არ იცვლება“.

„ჩვენი პასუხი ნათელია - სანამ არის ოკუპაციის მძიმე გარემოება, ჩვენს შორის დიპლომატიური ურთიერთობები ვერ აღდგება. როცა საქართველოს საერთაშორისოდ აღიარებულ ტერიტორიაზე არსებობს რუსეთის ფედერაციის ორი სხვა საელჩო, ამ შემთხვევაში, დიპლომატიური ურთიერთობების აღდგენაზე საუბარი არ ხდება.

ჩვენ ხომ მიჩვეული ვართ, რომ საქართველოს მიმართ ყველას აქვს თავისი ინტერესი. ეს ინტერესი მაინცდამაინც არ არის ყოველთვის სიკეთით გამსჭვალული. ამიტომ ხან ჩრდილოეთიდან, ხან დასავლეთიდან, ხან აღმოსავლეთიდან, ხან სამხრეთიდან ვიღაცა რაღაც განცხადებას გააკეთებს. ამიტომ მოგიწოდებთ, რომ ყველა ამ განცხადებას ცივი გონებით შევხედოთ და ქვეყნისათვის პრაგმატული პოზიციიდან გავცეთ პასუხი,“ - განაცხადა ქადაგიშვილმა.

ცნობისთვის, რუსეთის საგარეო საქმეთა მინისტრის მოადგილემ, მიხაილ გალუზინომ განაცხადა, რომ რუსეთი მზად არის რუსეთ-საქართველოს კავშირების გასაღრმავებლად.

მისი თქმით, პოლიტიკური დიალოგის არ არსებობა მკვეთრად ეწინააღმდეგება ამ ეკონომიკურ წარმატებებს.

"მზად ვართ, რუსეთ-საქართველოს კავშირების გასაღრმავებლად - ღირს, საქართველოს ხელისუფლება დაუფიქრდეს, რამდენად დიდი შედეგების მიღწევა იქნებოდა შესაძლებელი რუსეთთან დიპლომატიური ურთიერთობებით," - განაცხადა მიხაილ გალუზინიმ.