სლოვაკეთის პარლამენტის თავმჯდომარე საქართველოს უახლოეს პერიოდში ესტუმრება, ასევე, დაგეგმილია პრემიერ-მინისტრის, რობერტ ფიცოს ვიზიტიც.

ამის შესახებ სლოვაკეთის საგარეო საქმეთა მინისტრმა იურაი ბლანარიმ საქართველოს საგარეო საქმეთა მინისტრ მაკა ბოჭორიშვილთან ერთად გამართულ პრესკონფერენციაზე განაცხადა.

იურაი ბლანარის თქმით, სლოვაკეთის რესპუბლიკა სრულად უჭერს მხარს საქართველოს სუვერენიტეტს და ტერიტორიულ მთლიანობას.

„მინდა, განვაცხადო, რომ საქართველოსა და სლოვაკეთს შორის ურთიერთობები ძალიან კარგია. არავითარი პრობლემები არ არსებობს. ასევე, ურთიერთობები ძალიან კარგია უმაღლეს დონეზე. [სლოვაკეთის] პარლამენტის თავმჯდომარე უახლოეს დროში ესტუმრება საქართველოს, ასევე, დაგეგმილია პრემიერ-მინისტრის ვიზიტიც. ვცდილობთ, რომ ვიზიტი რაც შეიძლება მალე განხორციელდეს.

მოხარული ვარ, რომ ჩვენი ურთიერთობები მყარდება ახალი საკონსულოების გახსნით, მაგალითად, საკონსულო გაიხსნა ქუთაისში. ურთიერთობების გაუმჯობესება ხდება პირდაპირი საჰაერო მიმოსვლითაც, რომელიც დაინიშნა ბრატისლავიდან ქუთაისამდე და პირიქით. საქართველო ძალიან მიმზიდველია ტურისტული კუთხითაც. მინდა, რომ ხაზგასმით განვაცხადო, სლოვაკეთის რესპუბლიკა სრულად უჭერს მხარს საქართველოს სუვერენიტეტს და ტერიტორიულ მთლიანობას. თქვენი ქვეყნის ერთიანობისა და სუვერენიტეტისადმი მხარდაჭერას ვაცხადებთ, მიუხედავად იმისა, რომელი ქვეყანა დაარღვევს ტერიტორიულ მთლიანობას“, - განაცხადა იურაი ბლანარიმ.