აშშ-ის პრეზიდენტის დონალდ ტრამპის განცხადებით, ის ირიბად ჩაერთვება ირანსა და აშშ-ს შორის თეირანის ბირთვულ პროგრამასთან დაკავშირებით სამშაბათს ჟენევაში დაგეგმილ მოლაპარაკებებში.

„მე ამ მოლაპარაკებებში ირიბად ჩავერთვები. მოლაპარაკებები ძალიან მნიშვნელოვანი იქნება“, - განუცხადა ტრამპმა ჟურნალისტებს Air Force One-ის ბორტზე.

შეთანხმების მიღწევის პერსპექტივებთან დაკავშირებით კითხვაზე, ტრამპმა უპასუხა, რომ ირანი დიდი ხანია ცდილობს მოლაპარაკებებში მკაცრი პოზიციის დაკავებას, მაგრამ ამ მიდგომის შედეგები გასულ ზაფხულს ისწავლა, როდესაც აშშ-მა ირანის ბირთვული ობიექტები დაბომბა.

აშშ-ის პრეზიდენტის თქმით, თეირანი ამჯერად მოლაპარაკებებისთვის მოტივირებულია.

„არა მგონია, მათ სურდეთ შედეგები, რასაც შეთანხმების მიუღწევლობა მოიტანს“, - აღნიშნა ტრამპმა.