რუსეთმა, ჩინეთმა და ირანმა ხომალდები გაგზავნეს ერთობლივი წვრთნებისთვის, რომელიც უახლოეს მომავალში ჰორმუზის სრუტეში გაიმართება, - ამის შესახებ რუსეთის პრეზიდენტის თანაშემწემ ნიკოლაი პატრუშევმა განაცხადა.

„ძალიან აქტუალური აღმოჩნდა წვრთნები „საზღვაო უსაფრთხოების სარტყელი 2026“ ჰორმუზის სრუტეში, სადაც რუსეთმა, ჩინეთმა და ირანმა თავიანთი ხომალდები გაგზავნეს“, - აღნიშნა პატრუშევმა.

მანამდე, ირანულმა მედიამ გაავრცელა ინფორმაცია, რომ ირანი, რუსეთი და ჩინეთი თებერვლის ბოლოს ინდოეთის ოკეანის ჩრდილოეთ ნაწილში მერვე ერთობლივ საზღვაო წვრთნებს, „უსაფრთხოების სარტყელს“, ჩაატარებენ.

წვრთნებში მონაწილეობას მიიღებენ ირანის სამხედრო-საზღვაო ძალების, ისლამური რევოლუციის გუშაგთა კორპუსის სამხედრო-საზღვაო ძალების და ჩინეთისა და რუსეთის სამხედრო-საზღვაო ძალების გემები.

წვრთნები - „საზღვაო უსაფრთხოების სარტყელი“ - 2019 წლიდან ირანის სამხედრო-საზღვაო ძალების ინიციატივით ტარდება. ირანული მედია წერს, რომ წვრთნების მიზანია გლობალური საზღვაო ვაჭრობის უსაფრთხოების გაძლიერება. სამი ქვეყნის სამხედრო-საზღვაო ძალების ერთობლივი მოქმედებები მოიცავს მეკობრეობის წინააღმდეგ ბრძოლას, საზღვაო ტერორიზმის წინააღმდეგ ბრძოლას და სამაშველო ოპერაციების ჩატარებას.