საკონსტიტუციო ორგანოების არაღიარება მოდად შემოვიდა და ეს ის პირველი ნაბიჯია, რომელსაც შემდგომში ძალადობრივი მოქმედებები მოსდევს, - ამის შესახებ „ხალხის ძალის“ დეპუტატმა, ეკა სეფაშვილმა ჟურნალისტებთან განაცხადა, რითაც გამოეხმაურა დაანონსებულ ცვლილებებს, რომლის თანახმად, „სისხლის სამართლის კოდექსს“ ახალი მუხლი ემატება სახელწოდებით: „ექსტრემიზმი კონსტიტუციური წყობილების წინააღმდეგ“.

მისი თქმით, ამ კანონების მიუხედავად ნებისმიერ ადამიანს შეუძლია თავისი პროტესტი გამოხატოს მშვიდობიანი გზით და ეს კანონით დასჯადი და აკრძალული არ არის.

„საკონსტიტუციო ორგანოების არაღიარება მოდად შემოვიდა და ეს ის პირველი ნაბიჯია, რომელსაც შემდგომში ძალადობრივი მოქმედებები მოსდევს. ეს არის ტერორიზმისკენ, რადიკალიზმისკენ და ძალადობისკენ მიმართული პირველი ნაბიჯები. სწორედ ამას უნერგავენ ახალგაზრდებს და ხალხს, ვინც მიტინგებზე ძალადობას ჩადის სახელმწიფო ინსტიტუტების, პოლიციელების წინააღმდეგ და არაკანონიერად იბრძვიან. კანონიერად, ანუ მშვიდობიანად პროტესტის გამოხატვა ამ ქვეყანაში აკრძალული არ არის. ამ კანონების მიუხედავად ნებისმიერ ადამიანს შეუძლია თავისი პროტესტი გამოხატოს მშვიდობიანი გზით - ეს კანონით დასჯადი და აკრძალული არ არის”, - განაცხადა სეფაშვილმა.

ცნობისთვის, კონსტიტუციური წყობილების ან კონსტიტუციური ორგანოების არაღიარების მოტივით ჩადენილი ნებისმიერი ადმინისტრაციული სამართალდარღვევა ადმინისტრაციული პასუხისმგებლობის დამამძიმებელი გარემოება იქნება.

ამასთან, კონსტიტუციური ორგანოების არაღიარებაზე სისხლის სამართლის პასუხისმგებლობაც შემოდის და “სისხლის სამართლის კოდექსს“ ახალი მუხლი - 316-ე პრიმა მუხლი ემატება სახელწოდებით: “ექსტრემიზმი კონსტიტუციური წყობილების წინააღმდეგ“.