ვატიკანი „მშვიდობის საბჭოში“ მონაწილეობას არ მიიღებს, - ამის შესახებ ვატიკანის სახელმწიფო მდივანმა, კარდინალმა პიეტრო პაროლინმა განაცხადა.

„ვატიკანი „მშვიდობის საბჭოში“ მონაწილეობას არ მიიღებს, მისი განსაკუთრებული ბუნებიდან გამომდინარე, რაც სხვა სახელმწიფოების ბუნებიდან აშკარად განსხვავდება. რამდენიმე კრიტიკული საკითხი არსებობს. ერთი ის არის, რომ საერთაშორისო დონეზე კრიზისებს გაერო უნდა მართავდეს“, - განაცხადა კარდინალმა პიეტრო პაროლინმა.

ცნობისთვის, ვატიკანის სახელმწიფო მდივანმა, პიეტრო პაროლინმა გასულ თვეში განაცხადა, რომ აშშ-ის პრეზიდენტმა, დონალდ ტრამპმა რომის პაპი ლეო XIV „მშვიდობის საბჭოში“ მიიწვია.

„მშვიდობის საბჭოს“ პირველი სამიტი ვაშინგტონში 19 თებერვალს გაიმართება. იტალიამ და ევროკავშირმა განაცხადეს, რომ მათი წარმომადგენლები ვაშინგტონში დაგეგმილ „მშვიდობის საბჭოს“ სამიტს დამკვირვებლის სტატუსით დაესწრებიან.

„მშვიდობის საბჭოს“ წესდების ხელმოწერის ცერემონია გასულ თვეში, დავოსში გაიმართა. ამჟამად საბჭოს შემადგენლობაში წესდების ხელმომწერი 22 სახელმწიფოა. „მშვიდობის საბჭო“, რომელსაც აშშ-ის პრეზიდენტი, დონალდ ტრამპი ხელმძღვანელობს, თავდაპირველად ღაზას რეკონსტრუქციაზე პასუხისმგებელ ორგანოდ ჩამოყალიბდა, თუმცა, ორგანიზაციის წესდების თანახმად, მის მისიას მთელ მსოფლიოში არსებული კონფლიქტების მოგვარება წარმოადგენს.