ბულგარეთში ვადამდელი საპარლამენტო არჩევნები 19 აპრილს გაიმართება
ბულგარეთში ვადამდელი საპარლამენტო არჩევნები 19 აპრილს გაიმართება, - ამის შესახებ ქვეყნის პრეზიდენტმა, ილიანა იოტოვამ განაცხადა.
„ბრძანებას გამოვცემ 19 აპრილს არჩევნების ჩატარების შესახებ“, - განაცხადა ბულგარეთის პრეზიდენტმა, ილიანა იოტოვამ.
შეგახსენებთ, დეკემბერში ბიუჯეტისა და კორუფციის წინააღმდეგ საპროტესტო აქციების ფონზე ბულგარეთის ყოფილი პრემიერ-მინისტრის, როსენ ჟელიაზკოვის კოალიციური მთავრობა გადადგა. პოლიტიკურმა პარტიებმა კი ახალი მთავრობის ფორმირება ვერ შეძლეს.
პოლიტიკური კრიზისის ფონზე, ბულგარეთის ყოფილი პრეზიდენტი, რუმენ რადევი იანვარში თანამდებობიდან გადადგა. ადგილობრივი მედიის ინფორმაციით, მოსალოდნელია, რომ რადევი ვადამდელ საპარლამენტო არჩევნებში მონაწილეობას მიიღებს.
რუმენ რადევის გადადგომის შემდეგ ბულგარეთის პრეზიდენტის თანამდებობა მისმა ვიცე-პრეზიდენტმა, ილიანა იოტოვამ დაიკავა. გასულ კვირას იოტოვამ დროებითი მთავრობა დანიშნა, რომელსაც აპრილში დაგეგმილ არჩევნებამდე ბულგარეთის ეროვნული ბანკის მმართველის ყოფილი მოადგილე, ანდრეი გიუროვი უხელმძღვანელებს.
ცნობისთვის, ეს ბოლო ხუთი წლის განმავლობაში ბულგარეთში მერვე საპარლამენტო არჩევნები იქნება.
