სლოვაკეთმა ნავთობის ინდუსტრიაში საგანგებო მდგომარეობა გამოაცხადა, - ინფორმაციას ადგილობრივი მედია ავრცელებს.

სლოვაკეთის მთავრობამ ნავთობის არასაკმარისი რაოდენობით მიწოდების გამო ქვეყნის ნავთობის ინდუსტრიაში საგანგებო მდგომარეობა გამოაცხადა.

ასევე, სლოვაკეთის მთავრობის განცხადებით, „სლოვნაფტის“ ნავთობგადამამუშავებელი ქარხნის მოთხოვნით სტრატეგიული ნავთობის რეზერვებიდან 250 000 ტონა ნავთობს გამოიყენებს.

„ეს ნავთობგადამამუშავებელი ქარხნის მუშაობას მინიმალურ რეჟიმში სულ მცირე ერთი თვის განმავლობაში უზრუნველყოფს, რითაც სლოვაკეთის ბაზარზე ნავთობის უწყვეტად მიწოდება გაგრძელდება“, - ნათქვამია მთავრობის განცხადებაში.

ცნობისთვის, სლოვაკეთსა და უნგრეთს ნავთობი უკრაინის გავლით „დრუჟბას“ ნავთობსადენით 27 იანვრის შემდეგ აღარ მიეწოდებათ. უკრაინის განცხადებით, ამის მიზეზი ნავთობსადენზე რუსეთის თავდასხმაა, ხოლო სლოვაკეთი და უნგრეთი უკრაინას ნავთობის მიწოდების განზრახ შეჩერებაში ადანაშაულებენ.

უნგრეთის საგარეო საქმეთა მინისტრმა, პიტერ სიიარტომ ორშაბათს განაცხადა, რომ უნგრეთმა და სლოვაკეთმა ხორვატიას სთხოვეს, რუსული ნავთობის ადრიატიკის ნავთობსადენით მიწოდება დაუშვას.

სლოვაკეთის მთავრობის ცნობით, ხორვატიის გავლით რუსული ნავთობი სლოვაკეთამდე 20-30 დღეში მიაღწევს.