შსს-ში აცხადებენ, რომ ბიზნესმენ ლევან ჯანგველაძის მკვლელობის საქმის განხილვის პარალელურად, სასამართლოსთან მომხდარ დაპირისპირებასთან დაკავშირებით 15 პირია დაკავებული
თბილისის საქალაქო სასამართლოს მიმდებარედ ფიზიკური დაპირისპირების საქმეზე 15 ადამიანია დაკავებული. ამის შესახებ „ინტერპრესნიუსს“ შინაგან საქმეთა სამინისტროში განუცხადეს.
ამ ეტაპზე მიმდინარეობს საგამოძიებო მოქმედებები და ჯერჯერობით უცნობია რა მუხლის დარღვევას ედავება საგამოძიებო უწყება დაკავებულებს.
ცნობისთვის, თბილისის საქალაქო სასამართლოში, ბიზნესმენ ლევან ჯანგველაძის ანგარებით, შეკვეთით მკვლელობის საქმეზე ბრალდებული ძმების, დავით და გიორგი მიქაძეებისა და გიორგი ჯოხაძის სასამართლო პროცესის პარალელურად, თბილისის საქალაქო სასამართლოსთან ფიზიკური და სიტყვიერი დაპირისპირება მოხდა.
ერთმანეთს, სავარაუდოდ, პროცესზე მყოფი პირები დაუპირისპირდნენ. კადრებში ჩანს, რომ რამდენიმე პირმა სასამართლოს ეზოს გარე პერიმეტრზე, ერთ-ერთი მანქანა დააზიანა.
