პერუს კონგრესმა ქვეყნის დროებითი პრეზიდენტი აირჩია
პერუს კონგრესმა ქვეყნის დროებითი პრეზიდენტი აირჩია, - ინფორმაციას Reuters-ი ავრცელებს.
პერუელმა კონგრესმენებმა კონგრესის თავმჯდომარისა და დროებითი პრეზიდენტის თანამდებობაზე ხოსე ბალკასარი აირჩიეს, რომელიც ქვეყანას 12 აპრილს დაგეგმილ საყოველთაო არჩევნებამდე უხელმძღვანელებს.
პერუს კონგრესში გამართულ კენჭისყრაზე მემარცხენე ხოსე ბალკასარმა მემარჯვენე-ცენტრისტი მარია დელ კარმენ ალვა 64 ხმით 46-ის წინააღმდეგ დაამარცხა.
83 წლის ხოსე ბალკასარი ბოლო რვა წლის განმავლობაში პერუს მერვე პრეზიდენტია.
ბალკასარმა პრეზიდენტის თანამდებობაზე ხოსე ხერი შეცვალა, რომელიც პერუს კონგრესმა ქვეყნის პრეზიდენტის თანამდებობიდან გუშინ გადააყენა. ხოსე ხერი, რომელიც პრეზიდენტის თანამდებობას სულ რაღაც ოთხი თვის განმავლობაში იკავებდა, კონგრესმა ჩინელ ბიზნესმენებთან ფარული შეხვედრების გამო შექმნილი სკანდალის ფონზე გადააყენა.
