თურქეთი იმედოვნებს, რომ აშშ და ირანი ნამდვილ მოლაპარაკებებს სამხედრო ოპერაციის ან ომის გარეშე მიაღწევენ, - ამის შესახებ თურქეთის საგარეო საქმეთა მინისტრმა ჰაკან ფიდანმა განაცხადა.

„ჩვენი სურვილია, რომ სამხედრო ოპერაციის ან ომის საჭიროება არ იყოს და მხარეებმა ნამდვილად მიაღწიონ მოლაპარაკებებს“, - განაცხადა ფიდანმა.

მისი თქმით, ეს არის საკითხი, რომელსაც ანკარა ყურადღებით აკვირდება.

„როგორც იცით, ეს არის საკითხი, რომელსაც ჩვენ ყურადღებით ვაკვირდებით. სტამბოლში დაწყებულმა პროცესმა ამერიკელებსა და ირანელებს შორის საუბრის განახლება გამოიწვია. ეს უაღრესად მნიშვნელოვანი მოვლენაა. არსებითად, იმედისმომცემი მრავალი მიზეზი არსებობს. ვიმედოვნებთ, რომ ისინი შედეგს მიაღწევენ, განსაკუთრებით ბირთვულ საკითხთან დაკავშირებით“, - განაცხადა ფიდანმა.

ამასთან, მისი თქმით, რეგიონში აშშ-ის მზარდი სამხედრო აქტივობა „მკაცრად“ კონტროლდება.

„ვაკვირდებით, რომ სამხედრო მობილურობაც გაიზარდა. რა თქმა უნდა, ჩვენ ყურადღებით ვაკვირდებით, მიზნად ისახავს თუ არა ეს სამხედრო აქტივობა მიმდინარე მოლაპარაკებებზე ზეწოლას, თუ ეს წინასწარ დაგეგმილი სამხედრო ოპერაციისთვის მზადებაა“, - აღნიშნა თურქეთის საგარეო უწყების ხელმძღვანელმა.

ამასთან, მან ხაზგასმით აღნიშნა, რომ პოზიტიური დიპლომატიური სიგნალების მიუხედავას, პროცესი კრიტიკულ ზღურბლზე რჩება.

„როგორ ხდება ეს პრაქტიკულად განხორციელებადი, როდის მოხდება, როგორ აღიქვამენ ამას მხარეები და როგორ წარმართავს ეს აღქმა მათ შემდეგ ნაბიჯებს - ახლა კრიტიკულ ზღურბლზე ვართ. ამას ყურადღებით უნდა დავაკვირდეთ“, - აღნიშნა ჰაკან ფიდანმა.