ევროკავშირი რუსეთის წინააღმდეგ სანქციების მე-20 პაკეტის მიღებას 23 თებერვალს გეგმავს. ამის შესახებ ევროკავშირის უმაღლესმა წარმომადგენელმა, კაია კალასმა კრაკოვში „E5 ქვეყნების” თავდაცვის მინისტრების შეხვედრის შემდეგ პრესკონფერენციაზე განაცხადა.

„შემდეგ ორშაბათს [23 თებერვალს] რუსეთის წინააღმდეგ სანქციების მე-20 პაკეტის მიღებას ვაპირებთ. სანქციები მუშაობს, ისინი მძიმე ზიანს აყენებენ რუსეთის ეკონომიკას, და ყოველი ახალი ზომა უფრო ამცირებს მის შესაძლებლობას ომი აწარმოოს. მოსკოვი უძლეველი არ არის. მისი არმია რეკორდულ დანაკარგებს განიცდის და მისი ეკონომიკა მძიმე მდგომარეობაშია. მაგრამ პუტინი ამ ომს არ დაასრულებს მანამ, სანამ ხარჯები სარგებელს არ გადააჭარბებს და ეს არის მიზანი, რომელსაც უნდა მივაღწიოთ”,- განაცხადა კალასმა.