„არემჯის“ ინიციატივითა და ფინანსური მხარდაჭერით, ასევე ბოლნისის მუნიციპალიტეტის მერიის ჩართულობით დაბა კაზრეთის კულტურის სახლის სრული რეაბილიტაცია განხორციელდება. ინფორმაციას კომპანია „არემჯი“ ავრცელებს.

მათივე ცნობით, სარეაბილიტაციო სამუშაოები კულტურის სახლის ორი სართულის, ჯამში 1 100 კვ. მეტრის ფართობის, ექსტერიერისა და ინტერიერის სრულ განახლებას, ასევე ეზოს მოპირკეთებას და ლანდშაფტის სამუშაოებს ითვალისწინებს.

„წინასწარ მომზადებული პროექტის მიხედვით, სარეაბილიტაციო სამუშაოების ხანგრძლივობა 1 წელია, ხოლო პროექტის ღირებულება 2 მილიონ ლარს შეადგენს. პროექტის ფარგლებში მოხდება კულტურის სახლში არსებული 300 სტუმარზე გათვლილი საკონცერტო დარბაზის განახლება, სრულად გამოიცვლება დარბაზის სცენა, რომელიც აღიჭურვება გახმოვანების და სხვა საჭირო თანამედროვე აპარატურით.

შენობა ასევე აღჭურვილი იქნება ახალი გათბობა-გაგრილებისა და სახანძრო უსაფრთხოების სისტემებით.

პროექტის ფარგლებში, 70 კვ. მეტრის ფართობზე დამატებით მოეწყობა ქორეოგრაფიული ანსამბლებისთვის განკუთვნილი სარეპეტიციო დარბაზი, რომელსაც ექნება გასახდელები და სველი წერტილები. დღეის მდგომარეობით კაზრეთის კულტურის სახლში 6 სახელოვნებო წრე და სტუდია-ანსამბლი ფუნქციონირებს, რომელიც 180 მოზარდს ემსახურება. 2009 წლიდან აქვე განთავსდა დაბა კაზრეთის ბიბლიოთეკა, რომელსაც ყოველწლიურად 500-ზე მეტ მკითხველი სტუმრობს.

ბოლო წლებში კულტურის სახლში არსებული ავარიული მდგომარეობის გამო, აქ არსებული სახელოვნებო წრეები და ანსამბლები საქმიანობას სხვა შენობებში აგრძელებდნენ. კორპორაციული სოციალური პასუხისმგებლობის პროგრამის ფარგლებში, აღნიშნული წრეების საქმიანობას „არემჯი“ ყოველწლიურად აფინანსებს. 2027 წლიდან ყველა სტუდია და ანსამბლი განახლებულ კულტურის სახლში მოიყრის თავს, სადაც ახალგაზრდები უკვე კეთილმოწყობილ სივრცეში შეძლებენ სხვადასხვა კულტურულ-საგანმანათლებლო აქტივობებში ჩართვას“,- აღნიშნულია ინფორმაციაში.