თქვენ რომ მავთული გგონიათ, იმაზე საახალწლოდ ორნამენტები მაგრდებოდა და რჩებოდა სულ, - ამის შესახებ ათონელის სასახლის დაცვის ხელმძღვანელმა გიორგი წეველიძემ ადვოკატის საპასუხოდ განაცხადა, რომელმაც მას საქმის მასალებიდან ვიდეო წარუდგინა.

ადვოკატმა დიმიტრი ვარდიაშვილმა სდსს-ის თანამშრომელს ის კადრები აჩვენა, რომელშიც მისი შეფასებით, ჩანს, რომ სასახლის ღობე მავთულით იყო გადაბმული.

გიორგი წეველიძემ განაცხადა, რომ ღობე წინასწარ დაზიანებული არ ყოფილა.

აღნიშნული სხდომის მიმდინარეობისას მოსამართლე რომეო ტყეშელაშვილმა ბრალდებული არჩილ ჭავჭანიძე სხდომათა დარბაზიდან გააძევა, იქამდე კი, რამდენჯერმე მისცა შენიშვნა.

„ყოველგვარ ზღვარს გაცდა ადგილიდან წამოძახილები. წესრიგის დარღვევის და სასამართლოს დაუმორჩილებლობის გამო გაძევებული ხართ",- მიმართა მოსამართლემ ბრალდებულს.

ცნობისთვის, ვლადიმერ გველესიანს, სერგო მეგრელიშვილს, ზურაბ ჭავჭანიძეს, გიორგი რურუას, ამირან დოლიშვილს, ანტონ ვარდანიძეს, გიორგი ქორქიას, ალექსანდრე ჩილაჩავას, გენადი კუპრეიშვილს, ლაშა ივანაძეს, ლევან ჯიქიას, სულხან ტუღუშს, ხვიჩა გოგოხიასა და რამაზ მამულაძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის ,,ა“ ქვეპუნქტით (სტრატეგიული და განსაკუთრებული მნიშვნელობის ობიექტის ხელში ჩაგდების მცდელობა, ჩადენილი ჯგუფურად) და 225-ე მუხლის მეორე ნაწილით (ჯგუფურ ძალადობაში მონაწილეობა) წარედგინათ, რაც სასჯელის სახედ და ზომად ექვს წლამდე თავისუფლების აღკვეთას ითვალისწინებს.