უკრაინას ეს ომი არ აურჩევია და მის დასასრულებლად ყველაფერს აკეთებს, - ამის შესახებ უკრაინის პრეზიდენტმა, ვოლოდიმირ ზელენსკიმ ევროპარლამენტში რუსეთის მიერ უკრაინაში სრულმასშტაბიანი შეჭრის მეოთხე წლისთავთან დაკავშირებით გამართულ სესიაზე სიტყვით გამოსვლისას განაცხადა.

„პუტინს არ შეუძლია შეეგუოს იმას, რომ სხვაგან ადამიანებს განსხვავებულად ცხოვრება შეუძლიათ და არა ისე, როგორც მას სურს. სწორედ ამიტომ ცდილობს ის ადამიანების გატეხას, არა მხოლოდ ახლა, არამედ მისი ხელისუფლებაში მოსვლის დღიდან. ის თავად ომს წარმოადგენს. ყველანი, ვინც პუტინს მხარს უჭერენ, ვერ ხვდებიან, რომ ომს ირჩევენ. ეს სიმართლე იყო 1999 წელს და სიმართლეა დღესაც. პუტინის რუსეთს საფუძველი ჩეჩნეთში ომით ჩაეყარა, შემდეგ კი საქართველოში გადაინაცვლა. პუტინი პატივს არ სცემს მისი მეზობლების დამოუკიდებლობას, ჩინეთისა და ჩრდილოეთ კორეის გარდა, რადგან ის მათზე დამოკიდებულია“, - განაცხადა ვოლოდიმირ ზელენსკიმ.

ამასთან, მისი თქმით, უკრაინას უსაფრთხოების ძლიერი გარანტიები და ევროკავშირში გაწევრიანების თარიღი სჭირდება, წინააღმდეგ შემთხვევაში, რუსეთის პრეზიდენტი, ვლადიმერ პუტინი ამ პროცესისთვის ხელის შეშლის მიზნით ყველაფერს გააკეთებს.

„თავისუფალ სამყაროში რუსული ნავთობის, რუსული ტანკერების, რუსული ბანკების და რუსი სამხედრო დამნაშავეების ადგილი არ უნდა იყოს. დროა, რომ რუსეთის აგრესიაში მონაწილე ყველა პირს ევროპაში შესვლა აეკრძალოს“, - აღნიშნა უკრაინის პრეზიდენტმა.