მაკა ბოჭორიშვილი - ჩვენთვის მნიშვნელოვანია, რომ გაერო-ს ამ ფორმატში საუბარი იყოს საქართველოს მიერ მიღწეულ პროგრესსა და გამოწვევებზე, რომლებიც დგას ჩვენი ქვეყნის წინაშე
ჩვენთვის მნიშვნელოვანია, რომ გაერო-ს ამ ფორმატში საუბარი იყოს საქართველოს მიერ მიღწეულ პროგრესსა და გამოწვევებზე, რომლებიც დგას ჩვენი ქვეყნის წინაშე, -ამის შესახებ საქართველოს საგარეო საქმეთა მინისტრმა მაკა ბოჭორიშვილმა ჟურნალისტებს განუცხადა, რითაც ჟენევაში ვიზიტი შეაფასა.
როგორც ბოჭორიშვილმა აღნიშნა, გარდა ამისა, ისინი ამ ფორმატს იყენებენ იმისთვის, რომ საერთაშორისო თანამეგობრობას საქართველოს რეგიონების ოკუპაციის საკითხი და ადამიანის უფლებების დარღვევების ფაქტები შეახსენონ, რომლებიც ხდება და თან ახლავს ოკუპაციას.
„ეს არის უმაღლესი დონის შეხვედრა ადამიანის უფლებების საკითხებზე გაეროს ფორმატში. კომიტეტი მუშაობს მთელი წლის განმავლობაში. ამ დროს, მაღალი დონის შეხვედრის ფარგლებში, განიხილება ის მთავარი საკითხები, რომლებიც მონაწილე ქვეყნებს აქვთ ადამიანის უფლებების დაცვის კუთხით. ჩვენთვის, რა თქმა უნდა, მნიშვნელოვანია, რომ ამ ფორმატში საუბარი იყოს საქართველოს მიერ მიღწეულ პროგრესსა და გამოწვევებზე, რომლებიც დგას ჩვენი ქვეყნის წინაშე. ჩვენ ამ ფორმატს ვიყენებთ იმისთვის, რომ კიდევ ერთხელ საერთაშორისო თანამეგობრობას შევახსენოთ საქართველოს რეგიონების ოკუპაციის საკითხი და ადამიანის უფლებების დარღვევების ფაქტები, რომლებიც ხდება და თან ახლავს ოკუპაციას,“ – განაცხადა მაკა ბოჭორიშვილმა.
მინისტრმა ასევე ყურადღება გაამახვილა ოკუპირებულ რეგიონებში არსებულ ვითარებასა და უკრაინაში მიმდინარე ომზე.
„ამასთან, იცით, რომ სრულდება ოთხი წელი უკრაინაში საომარი მოქმედებების დაწყებიდან და ეს ტრიბუნაც ასევე გამოვიყენეთ იმისთვის, რომ კიდევ ერთხელ დავაფიქსიროთ ჩვენი მტკიცე მხარდაჭერა უკრაინის ტერიტორიული მთლიანობისა და სუვერენიტეტისადმი, ასევე მშვიდობიანი გზით კონფლიქტის დარეგულირებასთან დაკავშირებით, რაც მნიშვნელოვანია ჩვენი რეგიონისთვის,“ – აღნიშნა ბოჭორიშვილმა.
