20 ივნისის საქმეზე, რომელზეც ბრალდებული შინაგან საქმეთა ყოფილი მინისტრი და პარტია „გახარია საქართველოსთვის“ ლიდერი გიორგი გახარიაა, დაზარალებულ ორ მოწმეს დაკითხავენ.

სასამართლოში ჩვენებას ვახტანგ ბერიკაშვილი და ომარ სეხნიაშვილი მისცემენ, ისინი ბრალდების მხარის მოწმეები არიან.

ვახტანგ ბერეკაშვილს გარდა იმისა, რომ საქმეში დაზარალებულის სტატუსი აქვს, მან ადამიანის უფლებათა ევროპულ სასამართლოში საქართველოს წინააღმდეგ საქმე მოიგო.

როგორც ცნობილია, სასამართლო პროცესი გიორგი გახარიას წინააღმდეგ მისი მონაწილეობის გარეშე მიმდინარეობს, ის ძებნაში იმყოფება.

ცნობისთვის, გიორგი გახარიას 20 ივნისის საქმეზე ბრალი სისხლის სამართლის კოდექსის 25, 117-ე მუხლის მე-3 ნაწილის „მ“ ქვეპუნქტით და 333-ე მუხლის მე-2 ნაწილით აქვს წარდგენილი, რაც ორ პირზე მეტის მიმართ ჯანმრთელობის განზრახ დაზიანებას და სახელმწიფო პოლიტიკური თანამდებობის მქონე პირის მიერ სამსახურებრივი უფლებამოსილების გადამეტებას გულისხმობს. აღნიშნული ქმედება სასჯელის სახედ და ზომად 13 წლამდე თავისუფლების აღკვეთას ითვალისწინებს.