პარლამენტთან საპროტესტო აქცია მიმდინარეობს.

საპროტესტო აქცია-მსვლელობა, რომელიც ვერის პარკთან დაიწყო, მარშით პარლამენტთან მივიდა და შეუერთდა პროტესტს, რომელიც უკვე წელზე მეტია იმართება.

მარშის მონაწილეებმა ტიტებით შეამკეს 9 აპრილის მემორიალი. საკანონმდებლო ორგანოსთან მათ ასევე გააჟღერეს საქართველოს ჰიმნი.

საპროტესტო აქციაზე იმყოფება საქართველოს მეხუთე პრეზიდენტი, სალომე ზურაბიშვილი, რომელმაც განაცხადა, რომ ქვეყნისთვის შეურაცხყოფაა, როცა მისი პოლიცია სხვა მხარეს დგას და „ვინც დღეს აქ არ დგას, ის არ არის საქართველოს მხარეს”.

“ჩემთვის მნიშვნელობა არ აქვს რას ამბობენ [ ქართული ოცნების წარმომადგენლები], მნიშვნელოვანია ქმედებები. ჩემთვის ეს დღე იმ გმირების დაფასების დღეა, რომლებმაც თავი გაწირეს საქართველოსთვის. ვინც დღეს აქ არ დგას და არ იზიარებს ამ სულისკვეთებას, ის არ არის საქართველოს მხარეს. ქვეყნისთვის შეურაცხმყოფელია, როდესაც მისი პოლიცია დგას სხვა მხარეს”, - აცხადებს ზურაბიშვილი.

აქციის მონაწილეების განცხადებით, დღევანდელი აქცია-მსვლელობის მთავარი მიზანია, 1921 წლის 25 თებერვლის მოვლენების გახსენება და იმ გმირებისადმი პატივის მიგება, რომლებმაც დედაქალაქი ბოლო ტყვიამდე დაიცვეს.