ისლანდია ევროკავშირში გაწევრიანების შესახებ მოლაპარაკებების დაწყებასთან დაკავშირებით რეფერენდუმს უახლოეს რამდენიმე თვეში ჩაატარებს, - ამის შესახებ ქვეყნის პრემიერ-მინისტრმა კრისტრუნ ფროსტადოტირმა ვარშავაში, პოლონეთის პრემიერ-მინისტრ დონალდ ტუსკთან ერთობლივ პრესკონფერენციაზე განაცხადა.

მისი თქმით, მთავრობას ჯერ არ მიუღია საბოლოო გადაწყვეტილება თარიღის შესახებ, მაგრამ ეს უახლოეს თვეებში მოხდება.

„მომდევნო რამდენიმე თვეში, შესაძლოა, რადგან ჯერ არ მიგვიღია საბოლოო გადაწყვეტილება თარიღის შესახებ, მაგრამ უახლოეს თვეებში ჩავატარებთ რეფერენდუმს ისლანდიის ევროკავშირში შესაძლო გაწევრიანებაზე მოლაპარაკებების დაწყების შესახებ“, - აღნიშნა ისლანდიის პრემიერმა.

მისი თქმით, ისლანდიისთვის მნიშვნელოვანი იქნება იმის დანახვა, რომ ქვეყნის გამორჩეული არქტიკული იდენტობა, ისევე როგორც მისი ცხოვრების წესი ან რესურსების გამოყენების წესი, გათვალისწინებული იქნება.