ახალგაზრდა იურისტთა ასოციაციის განცხადებით, ასოციაციის იურისტი გიორგი გოცირიძე, სასამართლოში დაიბარეს.

როგორც საია-ს განცხადებაშია აღნიშნული, იურისტი სასამართლოში დაბარებულია აქციების დროს ტროტუარზე დგომის გამო.

"ჩვენი კოლეგა, საქართველოს ახალგაზრდა იურისტთა ასოციაციის იურისტი, გიორგი გოცირიძე, სასამართლოში დაიბარეს მხოლოდ ტროტუარზე დგომის ფორმით მშვიდობიანი პროტესტის გამო.

გიორგი გამოცდილი კონსტიტუციონალისტია და იგი მრავალი წელია მუშაობს, მათ შორის, გამოხატვის თავისუფლების, შეკრების თავისუფლების საკითხებზე საქართველოში. დღეს ის თავად გახდა ანტიკონსტიტუციური მოწესრიგების სამიზნე.

ტროტუარზე დგომის გამო პირის პასუხისმგებლობის საკითხის დაყენება არის კონსტიტუციით გარანტირებული შეკრების თავისუფლების გაუმართლებელი შეზღუდვა.

ჩვენ ვუცხადებთ სოლიდარობას ჩვენს კოლეგას და ყველა იმ პირს, რომელიც ანტიკონსტიტუციური კანონმდებლობის სამიზნეა.

საია-ს გუნდი კვლავ ერთად განვაგრძობთ საქართველოს კონსტიტუციით გარანტირებული უფლებების დაცვას!", - ნათქვამია განცხადებაში.