აშშ-ის ვიცე-პრეზიდენტ ჯეი დი ვენსს აშშ-სა და ირანს შორის მიმდინარე მოლაპარაკებებში მიღწეული პროგრესის დეტალები გავუზიარე, - ამის შესახებ ომანის საგარეო საქმეთა მინისტრი, საიდ ბადრ ალბუსაიდი სოციალურ ქსელში წერს.

საიდ ბადრ ალბუსაიდი, რომელიც აშშ-სა და ირანს შორის მიმდინარე ბირთვულ მოლაპარაკებებში შუამავლის როლს ასრულებს, ვაშინგტონში აშშ-ის ვიცე-პრეზიდენტს, ჯეი დი ვენსს შეხვდა.

„ჩართულობისთვის მადლობელი ვარ და მომდევნო დღეების განმავლობაში გადამწყვეტ პროგრესს ველით. მშვიდობა ჩვენს ხელშია“, - წერს ომანის საგარეო საქმეთა მინისტრი X-ზე.

ცნობისთვის, აშშ-ის პრეზიდენტმა, დონალდ ტრამპმა განაცხადა, რომ „ირანთან დაკავშირებით გადაწყვეტილება ჯერჯერობით არ მიუღია“.

„არ შეიძლება ირანს ბირთვული იარაღი ჰქონდეს. უკმაყოფილო ვარ იმით, თუ როგორ აწარმოებენ მოლაპარაკებებს“, - აღნიშნა ტრამპმა.