ბრიტანეთის ძალები კვიპროსში, მათ სამხედრო ბაზაზე სავარაუდო დრონით თავდასხმაზე რეაგირებას ახდენენ, - ამის შესახებ გაერთიანებული სამეფოს თავდაცვის სამინისტრომ განაცხადა.

უწყების ინფორმაციით, დარტყმა სამეფო საჰაერო ძალების აკროტირის ბაზაზე შუაღამისას განხორციელდა.

„ჩვენი ძალების დაცვა რეგიონში უმაღლეს დონეზეა და ბაზამ ჩვენი ხალხის დასაცავად რეაგირება მოახდინა“, - განაცხადა თავდაცვის სამინისტროს პრესსპიკერმა.

მას მსხვერპლის ან დაზიანების შესახებ არ უსაუბრია.

სამეფო საჰაერო ძალების აკროტირის ბაზა ქალაქ ლიმასოლთან ახლოს მდებარეობს.

ლონდონმა ცოტა ხნის წინ ამ ბაზაზე თავდაცვითი ზომების სახით დამატებითი საშუალებები განათავსა, მათ შორის საჰაერო თავდაცვის სისტემები, რადარები და F-35 ტიპის თვითმფრინავები.

სააგენტო „ფრანს-პრესი“ იუწყება, რომ ინციდენტი მას შემდეგ მოხდა, რაც გაერთიანებულმა სამეფომ განაცხადა, რომ ირანული რაკეტებისა და მათი გამშვები მოწყობილობების განადგურების მიზნით თავდაცვითი დარტყმების განსახორციელებლად აშშ-ს ბრიტანული სამხედრო ბაზების გამოყენების უფლება მისცეს.