ლარნაკას აეროპორტის თავზე საჰაერო სივრცე ჩაკეტილია, - ამის შესახებ ინფორმაციას Reuters კვიპროსის ხელისუფლებაში წყაროზე დაყრდნობით ავრცელებს.

დღეს დილით კვიპროსმა გაავრცელა ინფორმაცია, რომ ლიბანთან ახლოს ცაში „შესაძლო საეჭვო ობიექტი“ გამოჩნდა.

„უსაფრთხოების მიზნებიდან გამომდინარე, ყველა შესაბამისი ზომა იქნა მიღებული კომპეტენტური ორგანოების მხრიდან ინციდენტის გამოსაძიებლად“, - განაცხადა ხელისუფლების წარმომადგენელმა.

თავის მხრივ, მედიის მიერ გავრცელებული ინფორმაციის შემდეგ, რომ კვიპროსის ლარნაკას აეროპორტის თავზე საჰაერო სივრცე დაიკეტა, კვიპროსის მთავრობამ განმარტება გააკეთა და აღნიშნა, რომ ცნობა სიმართლეს არ შეესაბამება. მთავრობის წარმომადგენლის განცხადებით, ორ რეისს „მოეთხოვა მოკლე დროით გაჩერება“ მას შემდეგ, რაც „შესაძლო საეჭვო ობიექტი“ შენიშნეს.

„ორი რეისიდან ერთ-ერთის კაპიტანმა ათენში დაბრუნება გადაწყვიტა, ხოლო მეორე რეისი მალევე ნორმალურად დაეშვა. საჰაერო სივრცე ჩვეულებრივად აგრძელებს ფუნქციონირებას“, - აღნიშნა პრესსპიკერმა.