სახელმწიფო უსაფრთხოების სამსახურში გამოკითხვაზე ისტორიკოსი და ოპოზიციონერი პოლიტიკოსი, გუბაზ სანიკიძე, თავდაცვის ყოფილი მინისტრი, თინა ხიდაშელი და „საბჭოთა წარსულის კვლევის ლაბორატორიის" წარმომადგენელი გიორგი კანდელაკი დაიბარეს.

როგორც „ინტერპრესნიუსთან“ ხიდაშელმა და სანიკიძემ განაცხადეს, მზად არიან, სუს-ის მიერ დაწყებული გამოძიების ფარგლებში კითხვებს უპასუხონ, თუმცა ისინი კითხვებზე პასუხის გაცემას მხოლოდ მაგისტრატ მოსამართლესთან აპირებენ.

რაც შეეხება კანდელაკს, არსებული ინფორმაციით, უწყებაში მისვლას ისიც არ აპირებს და მხოლოდ მაგისტრატი მოსამართლის კითხვებს უპასუხებს.

„ჯერ ველოდები მოსამართლის ზარს. კითხვებს, რა თქმა უნდა, მოსამართლის წინაშე ვუპასუხებ",- განაცხადა გუბაზ სანიკიძემ.

თინა ხიდაშელის თქმით კი, სასამართლოში კითხვებზე პასუხის გასაცემად ხვალ მივა.

არსებული ინფორმაციით, სუს-ს კითხვები პოლიტიკოსებთან მიმართებით მათი მხრიდან მედიაში გაკეთებული განცხადების საფუძველზე აქვს. პოლიტიკოსების განცხადებები ეხება საქართველოში ირანის გავლენების გაზრდას.

აღნიშნულთან დაკავშირებით, სახელმწიფო უსაფრთხოების სამსახურმა „ინტერპრესნიუსთან“ შემდეგი განმარტება გააკეთა.

„ბოლო დღეების განმავლობაში სხვადასხვა პირის მიერ, საჯაროდ, არაერთი ინფორმაცია გახმოვანდა საქართველოში სხვა ქვეყნების მხრიდან კადრების რეკრუტირების შესახებ და მათ შორის, იყო დადანაშაულება თუ მინიშნებები ტერორიზმის მიმართულებით.

ყურადღებით ვაკვირდებით და ვსწავლობთ როგორც ფაქტობრივი მოცემულობის საწინააღმდეგო ამ განცხადებების შინაარსს, აგრეთვე მათი ავტორების მოტივაციას, დაადანაშაულონ საქართველო მსგავს საკითხებში, განსაკუთრებით რეგიონში მიმდინარე საბრძოლო მოქმედებების ფონზე და იმ გარემოების გათვალისწინებით, რომ ასეთი განცხადებების არცერთ ავტორს სამართალდამცველებისთვის არასდროს არანაირი ინფორმაცია არ მოუწოდებია. დაწყებულია გამოძიება და განცხადებების ავტორებს დაესმებათ კითხვები ყველა მიმართულებით, მათ შორის, საშუალება მიეცემათ გამოძიების ფარგლებში მაინც მიუთითონ რაიმე კონკრეტული ფაქტის შესახებ“- განმარტავს სუსი „ინტერპრესნიუსთან“.