„ქართული ოცნების“ აქტივისტ, ბექა გოცირიძეზე ჯგუფურ ძალადობაში ბრალდებულებს - თორნიკე თოშხუასა და მინდია შერვაშიძეს 1 წლის ვადით თავისუფლების აღკვეთა მიესაჯათ
ყოფილი ფეხბურთელისა და „ქართული ოცნების“ აქტივისტის, ბექა გოცირიძის მიმართ ჯგუფურ ძალადობაში ბრალდებულები, თორნიკე თოშხუა და მინდია შერვაშიძე სასამართლომ დამნაშავედ ცნო.
აღნიშნული გადაწყვეტილება თბილისის საქალაქო სასამართლოს მოსამართლემ, ელენე გოგუაძემ მიიღო.
გოგუაძის განაჩენის მიხედვით, თორნიკე თოშხუასა და მინდია შერვაშიძეს 1 წლის ვადით თავისუფლების აღკვეთა მიესაჯათ. ისინი პენიტენციურ დაწესებულებას 5 თვეში დატოვებენ, ვინაიდან 7 თვეა, რაც პატიმრობაში იმყოფებიან.
მოსამართლის განმარტებით, სასამართლომ მოისმინა ბრალდების მხარისა და დაცვის მხარის პოზიციები, თუმცა, ვერ და არ გაიზიარა დაცვის მხარის პოზიცია აუცილებელ მოგერიებასთან დაკავშირებით.
გოგუაძის განმარტებით, სასამართლომ მათი პიროვნული მახასიათებლები, მათი პოზიციები გაითვალისწინა, ასევე ის, რომ დაკავებულები წარსულში ნასამართლევი არ არიან, თუმცა, ერთ-ერთი წარსულში ადმინისტრაციულ სახდელდადებულია.
გოგუაძის თქმით, როცა დაზარალებული დაკითხა, ის ბრალდებულების მიმართ ლოიალური იყო, თუმცა, დაზარალებულის პოზიცია ხშირ შემთხვევაში ვერ იქნება გადამწყვეტი სასჯელის ნაწილში.
მოსამართლის თქმით, მას ბრალდებულებმა დაუკარგეს ის მდგომარეობა, რომ მას როგორც მოსამართლეს შეძლებოდა არასაპატიმრო სასჯელი დაენიშნა, ან ლოიალური ყოფილიყო, თუმცა, მათ მაქსიმალური სასჯელი არ დაუნიშნა.
ცნობისთვის, თორნიკე თოშხუასა და მინდია შერვაშიძეს ბრალდება საქართველოს სისხლის სამართლის კოდექსის 126-ე მუხლის პირველი პრიმა ნაწილის „ბ“ ქვეპუნქტით ჰქონდათ წარდგენილი, რაც გულისხმობს ძალადობას, ჩადენილს ჯგუფურად. აღნიშნული ქმედება სასჯელის სახედ და ზომად ორ წლამდე თავისუფლების აღკვეთას ითვალისწინებს.
აღნიშნულ საქმეში დაზარალებულის სტატუსი ჰქონდა ყოფილ ფეხბურთელსა და "ქართული ოცნების" აქტივისტს, ბექა გოცირიძეს. დაკავებულებს სწორედ მის მიმართ განხორციელებულ ძალადობას ედავებიან.
ბექა გოცირიძე ცოტა ხნის წინ, სავარაუდოდ, გულის შეტევით გარდაიცვალა. მან სასამართლოში ჩვენება გარდაცვალებამდე მისცა და განაცხადა, რომ დაკავებულების მიმართ პრეტენზია არ გააჩნდა. მან მოსამართლეს მიმართა, „თუკი ბრალდებულებს გირაოთი გაუშვებდა და ახალ წელს სახლში შეხვდებოდნენ, ძალიან გაუხარდებოდა და რომ თავადაც მოიქნია ხელი და თავადაც ჩხუბობდა“.
