„კოალიცია ცვლილებისთვის“ ერთ-ერთი ლიდერის, ნიკა მელიას საქმეზე, რომელიც სასამართლოს უპატივცემლობას ეხება, დაცვის მხარემ მტკიცებულებები უდაო გახადა და საქმე დასკვნით ეტაპზე გადავიდა. აღნიშნული კი იმას ნიშნავს, რომ ამ საქმეზე სასამართლოში მტკიცებულებების გამოკვლევა არ მოხდება. შემდეგ სხდომაზე მხარეები დასკვნით სიტყვებს წარმოთქვამენ.

დღევანდელ პროცესზე კი ადვოკატმა გიორგი კონდახიშვილმა განაცხადა, რომ სწრაფი მართლმსაჯულების განხორციელებიდან გამომდინარე, ბრალდებულთან შეთანხმებით, საქმეზე წარმოდგენილი მტკიცებულებები უდაო გახადეს.

სხდომას არ ესწრებოდა ნიკა მელია.

შემდეგი სასამართლო პროცესი 18 მაისს, 13:00 საათზე გაიმართება.

მელიას სასამართლოს უპატივცემლობას, კერძოდ კი, ადმინისტრაციულ საქმეთა კოლეგიის მოსამართლისთვის, თორნიკე ქოჩქიანისთვის სიტყვიერი შეურაცხყოფის მიყენებას ედავებიან.

ცნობისთვის, ნიკანორ მელიას ბრალდება საქართველოს სისხლის სამართლის კოდექსის 366-ე მუხლის მე-2 ნაწილით (სასამართლოს უპატივცემულობა, რაც გამოიხატა მოსამართლის შეურაცხყოფით) წარედგინა, რაც სასჯელის სახედ და ზომად 2 წლამდე თავისუფლების აღკვეთას ითვალისწინებს.